Больш за 800 беларускіх навукоўцаў падпісалі ліст у падтрымку звольненых з Акадэміі навук калег

Источник материала: Свабода

«Стала вядома аб непрацягненьні кантрактаў цэлай групе высокакваліфікаваных навукоўцаў Інстытуту гісторыі Нацыянальнай акадэміі навук, якія найбольш актыўныя ў дзейнасьці прафсаюзу, рэальна абараняючы правы супрацоўнікаў. Цяпер, калі дзейнасьць прафсаюзаў прызнана дзяржавай як надзвычай важная, такі падыход выглядае дзіўным», — гаворыцца ў звароце, пад якім падпісаліся больш за 800 чалавек.

Падставай звароту стаў перасьлед за грамадзянскую пазыцыю супрацоўнікаў Інстытуту гісторыі і Інстытуту агульнай і неарганічнай хіміі Нацыянальнай акадэміі навук.

Гэта кандыдаты гістарычных навук Мікалай Волкаў, Аляксей Шаланда, Кацярына Крывічаніна, кандыдат філялягічных навук Аляксандар Жлутка, навуковыя супрацоўнікі Андрэй Радаман, Тацяна Папоўская, Уладзімер Шыпіла, а таксама Сяргей Бесараб.

ГЛЯДЗІЦЕ ТАКСАМА:

Навуковец заявіў, што БЧБ-сцяг — нацыянальны сымбаль беларускага народу. Зь ім не працягваюць кантракт

Асаблівую трывогу навукоўцаў выклікае тое, што некаторыя калегі атрымалі паведамленьнні аб непрацягненьні кантрактаў неўзабаве пасьля таго, як падрыхтавалі незалежныя экспэртныя заключэньні ў пытаньнях, што найбольш востра хвалююць беларускае грамадзтва.

Рэпрэсіі ў адносінах да прафэсіяналаў, якія выконваюць свае непасрэдныя абавязкі, недапушчальныя, адзначаюць падпісанты. Тым больш што ўсе пацярпелыя маюць высокую кваліфікацыю, мноства публікацый, патэнтаў, салідную рэпутацыю ў міжнароднай навуковай сфэры.

ГЛЯДЗІЦЕ ТАКСАМА:

«Рэпрэсіі недапушчальныя!». Больш за 500 навукоўцаў выступілі ў абарону звольненых калегаў

Сьпіс рэпрэсіраваных дадаецца да гэтага ліста і пастаянна папаўняецца.

Паводле навукоўцаў, фармальныя падставы звальненьня супрацоўнікаў выклікаюць абгрунтаваныя сумненьні, страта навуковых кадраў выкліча зьніжэньне якасьці дасьледаваньняў у напрамках, якія разьвівалі гэтыя экспэрты.

Апрача таго, абставіны падобных звальненьняў кідаюць цень на рэпутацыю Акадэміі навук і яе інстытутаў, падрываюць давер да кіраўніцтва і ствараюць нэгатыўную працоўную атмасфэру, пішуць аўтары звароту.

ГЛЯДЗІЦЕ ТАКСАМА:

Украінскія гісторыкі выступілі ў абарону звольненых беларускіх калег

Навукоўцы заклікалі кіраўніцтва НАН і яе інстытутаў адмовіцца ад практыкі палітычна матываваных скарачэньняў і ціску ды працягнуць кантракты беспадстаўна звольненым супрацоўнікам.

ГЛЯДЗІЦЕ ТАКСАМА:

50 польскіх антраполягаў падпісалі ліст салідарнасьці з арыштаваным беларускім калегам Уладзімерам Шыпілам