Праваабаронцы назвалі яшчэ пяць новых палітзьняволеных. Агулам такіх ужо 194

Источник материала: Свабода

У сувязі з інфармацыяй аб узяцьці пад варту і прад’яўленьні абвінавачваньняў паводле часткі 2 артыкулу 293 Крымінальнага кодэксу (масавыя беспарадкі) Аляксандры Патрасаевай, Аляксандру Рэзьніку, а таксама паводле часткі 1 артыкулу 342 Крымінальнага кодэкса (групавыя дзеяньні, якія груба парушаюць грамадзкі парадак) Міхаілу Феранцу, Віталю Шчэрбічу, Рэнаце Сьмірновай праваабарончая супольнасьць Беларусі прызнала:

• перасьлед Аляксандры Патрасаевай, Аляксандра Рэзьніка, Міхаіла Феранца, Віталя Шчэрбіча і Рэнаты Сьмірновай мае палітычна матываваны перасьлед у сувязі з рэалізацыяй імі свабоды мірных сходаў і выказваньня свайго меркаваньня адносна абвешчаных вынікаў выбараў прэзыдэнта Рэспублікі Беларусь.

ГЛЯДЗІЦЕ ТАКСАМА:

Ціханоўская заклікала ўнесьці ў санкцыйны сьпіс Эўразьвязу судзьдзяў і сілавікоў, якія білі людзей

На гэтай падставе прынятае рашэньне прызнаць названых асобаў палітычнымі зьняволенымі.

«Свабода мірных сходаў гарантаваная артыкулам 21 Міжнароднага пакту аб грамадзянскіх і палітычных правах. Дадзеная свабода не падлягае абмежаваньням, акрамя вызначаных законам і неабходных у дэмакратычных краінах дзеля нацыянальнай бясьпекі, грамадзкага парадку, аховы здароўя і маральнасьці насельніцтва. У Беларусі выступы насілі стыхійны, самаарганізаваны характар і былі выкліканыя недаверам да вынікаў выбараў 9 жніўня. Яны праходзілі са шматлікімі парушэньнямі, не былі прызнаныя міжнароднай супольнасьцю як дэмакратычныя, справядлівыя і свабодныя», — гаворыцца ў паведамленьні праваабаронцаў.

ГЛЯДЗІЦЕ ТАКСАМА:

На волю выйшаў палітвязень Юры Савіцкі, суд пастанавіў адправіць яго на «хімію»

Сходы грамадзянаў насілі мірны характар і не ўяўлялі пагрозы ні нацыянальнай, ні грамадзкай бясьпецы. Нягледзячы на гэта, дэманстранты былі атакаваныя спэцпадразьдзяленьнямі МУС з непрапарцыйным ужываньнем фізычнай сілы, спэцсродкаў і зброі. Упершыню ў гісторыі краіны ў дачыненьні да дэманстрантаў былі ўжытыя гумавыя кулі, сьвятлашумавыя гранаты, вадамёты.