Паліцэйскі, які на мітынгу ў Пецярбурзе збіў жанчыну нагой, выбачыўся. Ці магчыма такое ў Беларусі?

Пры падзенні жанчына стукнулася галавой аб асфальт. Лекары выявілі ў яе сатрасенне галаўнога мозгу, закрытую чэрапна-мазгавую траўму і гематому патыліцы. Медыкі ацанілі стан жанчыны як сярэдняй цяжкасці.

У той жа вечар пракуратура паабяцала правесці ўласную праверку інцыдэнту.

На наступны дзень той самы супрацоўнік паліцыі, які ўдарыў жанчыну ў жывот, прыйшоў да яе ў палату з кветкамі і папрасіў прабачэння. Верагодна, з ім таксама былі прадстаўнікі ведамства, якія запэўнівалі, што ён добры хлопец, проста так выйшла.

«Прабачце, мяне за пяць хвілін да гэтага залілі газам, у мяне запацела забрала, я не бачыў, што адбываецца», – сказаў паліцыянт.

«Галоўнае, што ўсе жывыя і здаровыя», – адказала жанчына.

Аднак на відэа добра відаць, што ў той момант забрала на шлеме было паднятае і супрацоўнік паліцыі бачыў усё, што адбывалася вакол і адмыслова ўдарыў жанчыну.

Падобны выпадак, калі міліцыянт ударам збіў жанчыну з ног, быў і ў Беларусі.

У верасні 2020 году міліцыянт ударыў у твар жыхарку Жодзіна, якая здымала на відэа яго і іншых супрацоўнікаў. Ад удару жанчына звалілася на зямлю і пасля была вымушана звярнуцца ў шпіталь.

У міліцыі патлумачылі, што супрацоўнік ужыў сілу «для самаабароны і затрымання».

У той жа дзень жанчына разам з адвакатам прыйшла ў Следчы камітэт, каб пакінуць там заяву па факце прымянення сілы супрацоўнікам міліцыі, аднак на яе саму склалі пратакол за ўдзел у акцыі.

Пазней стала вядома, што СК адмовіўся ўзбуджаць крымінальную справу на міліцыянта, спасылаючыся на тое, што ён «дзейнічаў ва ўмовах абгрунтаванай прафесійнай рызыкі або крайняй неабходнасці».