«Проста выставілі з ЦІПу ўвечары – ідзі гуляй». Адвакат Яна Салановіча – пра раптоўнае вызваленне хлопца. 21.by

«Проста выставілі з ЦІПу ўвечары – ідзі гуляй». Адвакат Яна Салановіча – пра раптоўнае вызваленне хлопца

26.01.2021 16:24 — Разное | Белсат  
Размер текста:
A
A
A

Источник материала: Белсат

Палтівязня Яна Салановіча адпусцілі з Акрэсціна нечакана – увечары 25 студзеня патэлефанавалі ягонай маці і сказалі, каб прыязджала за сынам. Па словах Дзмітрыя Пігуля, адваката хлопца, Яну не выдалі на рукі ніякіх дакументаў аб вызваленні, толькі квітанцыю на аплату адбытых содняў. Сям’я Салановічаў і адвакат у разгубленасці і не ведаюць, чаго чакаць далей. Хоць абаронца і падаваў скаргі ў Менскі гарадскі суд на прысуды, былыя пастановы аб соднях не былі скасаваныя.

Суд не вызваляў Яна

21-гадовы мянчук Ян Салановіч – рэкардсмен па соднях за ўдзел у несанкцыянаваных масавых мерапрыемствах па артыкуле 23.34 КаАП РБ.

Хлопца затрымалі 1 лістапада на праспекце Незалежнасці, судзілі восем разоў і пакаралі агулам 114 соднямі арышту. Ян – адзіны з асуджаных па адмінстратыўным артыкуле, каго праваабаронцы прызналі палітвязнем.

21-гадовы Ян Салановіч. Менск, Беларусь. 12 студзеня 2021 году. Фота: Агата Квяткоўская / Белсат

У размове з «Белсат» на пачатку года Вольга Салановіч, мама Яна, распавядала, што вызваленне мае адбыцца 23 лютага. Але доўгачаканая сустрэча з сынам раптоўна здарылася амаль на месяц раней – Яна вызвалілі 25 студзеня.

Спадарыня Вольга адмовілася неяк каментаваць сітуацыю. Таксама не хоча пакуль размаўляць і Ян.

З кароткага аповеду адваката хлопца Дзмітрыя Пігуля «Белсат» даведаўся, што Вользе Салановіч увечары 25 студзеня патэлефанаваў нехта з ЦІПа на Акрэсціна і сказаў, што Яна «выганяюць», маўляў, прыязджайце, забірайце. Больш ніякіх тлумачэнняў, падрабязнасцяў не было.

Яна адпусцілі толькі з квітанцыяй на аплату адбытых содняў, хоць, паводле адваката, мусілі выдаць даведку аб вызваленні з указаннем колькасці содняў, якія ён правёў за кратамі. На якіх юрыдычных падставах адбылося вызваленне, абаронца не ведае.

– Як раз сёння (26 студзеня – рэд.) я звярнуўся ў Менскі гарадскі суд, дзе на разглядзе знаходзяцца чатыры мае наглядныя скаргі на пастановы суда Партызанскага раёну аб спагнанні ў дачыненні да Яна, – распавёў адвакат. – Даведаўся, што ніякіх пастаноў аб адмене былых рашэнняў не было. То бок, суд не вызваляў Яна. Не змяншаў яму тэрмін арышту.

У любы момант могуць забраць дасіжваць содні

Спадар Пігуль кажа, што не разумее, паводле якой логікі адбылося вызваленне, да чаго яго маглі «прывязаць».

– Так, ёсць норма, паводле якой бесперарыўнае адбыццё адміністратыўнага арышту не можа быць даўжэйшым за 90 содняў запар, але гэта ў дадзеным выпадку не вельмі падыходзіць – Ян адседзеў 86 содняў, – разважае адвакат. – Але, магчыма, што яны да гэтай нормы «прывязалі» вызваленне. Але ў Яна застаюцца яшчэ 28 содняў, і цяпер цалкам магчыма, што па ўжо звыклым сцэнары яго могуць забраць у любы момант іх дасіжваць.

Спадар Пігуль будзе чакаць адказу на скаргі з Менскага гарадскога суду, а таксама спрабаваць атрымаць хоць нейкі дакумент з ЦІПу.

Адвакат перакананы, што справа Салановіча ад самага пачатку вялася з парушэннямі дзейснага працэсуальна-выканаўчага кодэксу.

– Па 7 з 8 эпізодаў удзелу ў несанкцыянаваных масавых мерапрыемствах паводле арт.7.4 КаАП мусіла быць вынесеная адна пастанова. І максімальна гэта мусіла быць 25 содняў. А яму штотыдзень складалі пратакол, і кожны раз па 14-15 содняў, у выніку атрымалася 114 содняў, – тлумачыць абаронца.

Вызвалілі, каб забраць у войска?

Спадар Пігуль паразмаўляў з Янам пасля ягонага вызвалення, і зазначае, што маладзён добра трымаецца.

– Ён моцны хлопец, стойкі. Закаліўся яшчэ больш у тых жахлівых умовах – без шпацыраў, душа, карэспандэнцыі, без матрасу на ложку нават ноччу, – кажа адвакат.

Пра жорсткія ўмовы ўтрымання «Белсату» распавядала раней мама Яна. За ўвесь час адбывання арышту (на момант размовы) хлопец толькі аднойчы трапіў у душ, таксама быў толькі адзін шпацыр. Яму цалкам блакавалі карэспандэнцыю, а ў студзені ЦІП перастаў прымаць перадачы.

Ян вучыўся на чацвёртым курсе БДУІР, на факультэце радыёфізікі і электронікі, спецыяльнасць – радыёэлектронныя сістэмы. Да затрымання спалучаў вучобу з працай у навукова-тэхнічным цэнтры КДБ. Падчас нашай размовы ў пачатку года спадарыня Вольга выказвала спадзяванне, што Яна не выключаць з універсітэту, што кіраўніцтва разумее сітуацыю і пойдзе насустрач.

Аднак 25 студзеня стала вядома, што Яна ўсё ж адлічылі.

Выказваюцца меркаванні, што цяпер Салановіча могуць забраць у войска, і з Акрэсціна яго нібыта выпусцілі менавіта дзеля гэтага.

Ганна Ганчар, belsat.eu

 
 
Чтобы разместить новость на сайте или в блоге скопируйте код:
На вашем ресурсе это будет выглядеть так
 
 
 

РЕКЛАМА

Архив (Разное)

РЕКЛАМА

© 2021 21.by