У Менску падчас рэйду КДБ па кватэрах у страляніне загінулі двое. Што вядома?. 21.by

У Менску падчас рэйду КДБ па кватэрах у страляніне загінулі двое. Што вядома?

29.09.2021 06:11 — Разное |  
Размер текста:
A
A
A

Источник материала:

«Падчас „адпрацоўкі адрасоў“ у адной з кватэр жыхар аказаў супраціў сілавікам — стрэліў у аднаго зь іх з паляўнічай стрэльбы. Сілавікі ў адказ адкрылі агонь і застрэлілі мужчыну. Паранены супрацоўнік КДБ загінуў», — так паведаміла Эўрарадыё, спасылаючыся на свае крыніцы.

Афіцыйна

Гэтую інфармацыю пацьвердзіў КДБ:

«Сёньня падчас правядзеньня спэцмерапрыемстваў па адпрацоўцы адрасоў, па якіх маглі знаходзіцца асобы, датычныя да тэрарыстычнай дзейнасьці, у адной з кватэр жылога дому па супрацоўніках праваахоўных органаў быў адкрыты агонь з стрэльбы на паражэньне. Асабліва небясьпечны злачынец у выніку сьмяротна параніў супрацоўніка Камітэту дзяржбясьпекі. Агнём у адказ злачынец быў зьнішчаны. Супрацоўнік ад атрыманых ран памёр».

Распачатая крымінальная справа паводле ч.2 арт.139 КК («Забойства асобы ў сувязі з ажыцьцяўленьнем ёю службовай дзейнасьці»).

Вэрсія Сьледчага камітэту:

«На законныя патрабаваньні супрацоўнікаў праваахоўных органаў 31-гадовы жыхар Менску адмовіўся адкрыць дзьверы кватэры і заблякаваўся ў ёй. З мэтай так званага „хайпа“ праводзіў відэаздымку. Пасьля пранікненьня ў кватэру супрацоўнікаў, мужчына адкрыў агонь з паляўнічай стрэльбы ў бок праваахоўнікаў. У выніку аднаму зь іх нанесены цялесныя пашкоджаньні, ад якіх ён памёр у бальніцы. З улікам характару ўжытага гвалту, збройнага супраціву ад 31-гадовага мужчыны, у адказ агнём ён быў ліквідаваны. Яго 40-гадовая жонка, якая таксама праводзіла відэаздымку злачынства і спрыяла яго зьдзяйсьненьню, затрыманая па падазрэньні ў суўдзеле забойства супрацоўніка».

Хто забіты

Паводле папярэдняй інфармацыі, забіты жыхар кватэры — Андрэй Зельцар, супрацоўнік EPAM Systems.

У сетцы LinkedIn ёсьць профіль супрацоўніка EPAM Андрэя Зельцара. Паводле яго, Андрэй працаваў у кампаніі з 2016 году на пазыцыі тым-ліда. Таксама там указана, што ў 2013 годзе ён скончыў Тэхнікум бізнэсу і права.

У Менску падчас рэйду КДБ па кватэрах у страляніне загінулі двое. Што вядома?
Андрэй Зельцар

У Андрэя Зельцара ёсьць профілі ў Інстаграме і Фэйсбуку. Як можна меркаваць па ягоных пастах, ён актыўна займаўся спортам — фэхтаваньнем, а таксама ўдзельнічаў у забегах, у тым ліку трэйлавых. Ёсьць у інстаграме і фота зброі.

Знаёмыя Андрэя напісалі, што ў яго ёсьць жонка і сын, вучань пачатковых клясаў. Дзе знаходзіўся малы падчас страляніны, невядома.

Маці Зельцара працуе выхавацелькай у дзіцячым садку, бацька ў яго інвалід. Раней бацька працаваў юрыстам у таварыстве інвалідаў «БелТІ», паведамляе «Наша Ніва».

У Менску падчас рэйду КДБ па кватэрах у страляніне загінулі двое. Што вядома?
Андрэй Зельцар са стрэльбай. Скрын зь відэа КДБ

У праўладных тэлеграм-каналах зьявілася інфармацыя пра загінулага супрацоўніка КДБ. Паведамляецца, што яго звалі Дзьмітры, а пазыўны быў «Нірвана». Мужчына 1990 году нараджэньня. У яго засталася жонка і малалетняе дзіця.

Сілавікі каля дома

Відавочцы паведамляюць, што сёньня ўвесь дзень сілавікі знаходзяцца па адрасе Якубоўскага, 29.

«Каля трэцяга пад’езду дома стаяць бус, легкавая машына і два аўтамабілі міліцыі. Шмат людзей у цывільным, міліцыянты ходзяць у бахілах і пальчатках», — перадаюць Naviny.by.

Пастаноўка?

Само відэа выклікала шэраг пытаньняў. З роліка незразумела, хто здымаў меркаванага стралка ў кватэры. Запіс змантаваны так, што момант, як куля трапляе ў супрацоўніка КДБ, не паказаны. Бачна толькі, як мужчына з стрэльбай страляе кудысьці ў калідор, а ў іншым змантаваным кавалку супрацоўнік у масцы страляе зь пісталета туды, дзе, як мяркуецца знаходзіцца стралок. У наступных кадрах супрацоўнікі выцягваюць свайго калегу, называючы яго «Дзімка» і «Нірвана», вакол яго сьляды крыві.

«Камэнтаваць пакуль рана. Але пытаньняў пакуль больш, чым адказаў», — пракамэнтавалі здарэньне ў ініцыятыве беларускіх сілавікоў ByPol.

Украінскі сілавік: відэа выклікае шмат пытаньняў

Радыё Свабода зьвярнулася да былога супрацоўніка Ўпраўленьня дзяржаўнай аховы Ўкраіны, падпалкоўніка запасу Службы бясьпекі Ўкраіны з просьбай пракамэнтаваць відэа, распаўсюджанае праўладнымі тэлеграм-каналамі з перастрэлкай у кватэры Андрэя Зэльцара.

Найперш суразмоўца зьвярнуў увагу на тое, як супрацоўнікі КДБ уваходзілі ў памяшканьне. «Калі ня ведаюць, у якой частцы кватэры знаходзіцца аб’ект, маюць падазрэньне пра наяўнасьць у яго зброі, то мусіць быць бронешчыт, каска або хаця б бронекамізэлька. Калі ў іх стралялі, то паводле ўсіх нормаў мусіў быць адказ светлашумавой гранатай. Шмат пытаньняў тут паўстае».

Апроч таго, суразмоўца зьвярнуў увагу на тое, як быў змантаваны відэазапіс. «Нешта не магу зразумець. З кватэры аб’екта вялася анлайн трансьляцыя? Неяк дзіўна ўсё выглядае».

«Чаму апэратыўнікі адкрывалі кватэру, а не спэцпрызначэнцы? Чаму яны ўсе былі ў цывільным, калі падазрэньні былі ў датычнасьці аб’екту да тэрарыстычнай дзейнасьці? Шмат пытаньняў…».

Што кажа сяброўка Андрэя Зэльцэра

«Я здагадваюся, чаму да яго прыйшлі, ён удзельнічаў у мінулым годзе ў акцыях пратэстаў супраць дзейнай улады, хутчэй за ўсё да яго цяпер дайшлі.

Андрэй быў вельмі спакойны, заўсёды адгукаўся на просьбы людзей. Шчыра, я б сказала, што ён ніколі ў жыцьці так не зрабіў бы, проста яго змусілі абставіны. Ён абараняў у першую чаргу сябе, у другую чаргу — сваю жонку. Ён заўсёды быў спакойным, заўсёды ўсьміхаўся. Мы ніколі не заўважалі, што ён за штосьці перажывае ці ў яго нешта здарылася».

Сяброўка Андрэя адзначае, што ніколі ня ведала, што ў яго была зброя, таму была шакаваная, калі ўбачыла відэа.

Як кажа сяброўка, раней Андрэй не прыцягваўся да адміністрацыйнай адказнасьці за ўдзел у мітынгах.

 
 
Чтобы разместить новость на сайте или в блоге скопируйте код:
На вашем ресурсе это будет выглядеть так
У страляніне, якая здарылася 28 верасьня ў Менску падчас рэйду КДБ па кватэрах, загінулі двое.
 
 
 


Архив (Разное)