станцыю метро "Кастрычніцкая" мяркуюць адкрыць у чацвер

Источник материала:

Мэр Мінска Мікалай Ладуцька ўчора на месцы трагедыі адзначыў, што другая лінія метро — Аўтазаводская — была "адчыненая з самага ранку і працуе, як і трэба".

— Зараз вядуцца рамонтныя работы, — гаворыць мэр. — Праведзена першаснае абследаванне канструкцыі — нейкіх прынцыповых адхіленняў няма. На ўсякі выпадак выклікана брыгада спецыялістаў-інжынераў, якія зробяць тэхнічнае абследаванне і дадуць сваё заключэнне. Зараз спецыялісты метрапалітэна, метрапраекта і метрабуду займаюцца работамі па навядзенні парадку на станцыі "Купалаўская".

Станцыю метро "Кастрычніцкая" плануюць адкрыць ужо ў гэты чацвер. Паводле слоў мэра, работа станцыі будзе ўзноўленая дзесьці ў раёне 12:00-14:00. Чакаецца, што праца ўсіх эскалатараў будзе адноўлена.

Мікалай Ладуцька нагадаў, што па даручэнні Прэзідэнта краіны Аляксандра Лукашэнкі ў мінскім гарадскім выканаўчым камітэце ўжо створаны штаб па аказанні дапамогі пацярпелым ад тэрарыстычнага акта. У хуткім часе будуць вызначаныя грашовыя сумы пацярпелым ад тэракта, а сем'ям загінулых будзе выдаткавана па 10 тысяч долараў. Жалобныя пахаванні пройдуць у сталіцы за кошт гарадскога бюджэту.

Акрамя таго, паводле слоў мэра, па просьбах людзей для дабрачынных мэтаў быў адкрыты адмысловы разліковы рахунак — туды будуць пералічвацца грошы для аказання дапамогі пацярпелым.

— Метро ў Мінску будавалася ўсім народам, гэта наш нацыянальны набытак, — падкрэсліў Мікалай Ладуцька. — Мы збіраем грашовыя сродкі на дапамогу пацярпелым, але, магчыма, якаясьці сума будзе выкарыстаная і для аднаўленчых работ метрапалітэна. Але гэта будзе толькі сімвалічная сума: сродкаў для выканання работ у гарвыканкама дастаткова.

Акрамя таго, Мікалай Ладуцька адзначыў, што панікі сярод жыхароў сталіцы не назіраецца:

— Жыхары Мінска адрэагавалі на падзеі гэтых дзён годна і з мужнасцю. Наш беларускі народ — гэта гераічны народ. І памяць пра тыя выпрабаванні, якія былі тут крыху больш за 60 гадоў, яшчэ жывая ў нашых генах. Таму гэты выклік, кінуты нам, мы сустракаем з мужнасцю. Для таго, каб яшчэ раз сказаць усім краінам, што мы — дружалюбны народ і курс, узяты кіраўніцтвам нашай краіны, накіраваны не толькі на дабрабыт нашага народа, але і на добрасуседскія адносіны з краінамі блізкага і далёкага замежжа.

Адказваючы на пытанне пра меры бяспекі, мэр зазначыў, што метрапалітэн абсталяваны дасканалай сістэмай відэаназірання — камеры былі закупленыя з разлікам на розныя надзвычайныя сітуацыі.

У заключэнне Мікалай Ладуцька паведаміў, што гарвыканкам рэкамендаваў змяніць рэпертуар усім сталічным рэстаранам і начным клубам для таго, каб цягам тыдня ніякіх забаўляльных мерапрыемстваў у горадзе не было. Трынаццатага красавіка ў Мінску аб'яўлены днём жалобы.

Ілья ЛАПАТО.

Р. S.:<І> У сувязі з тым, што работы па рамонце станцыі метро "Кастрычніцкая" не завершаны, рух цягнікоў па першай лініі метро 13 красавіка ажыццяўляцца не будзе. Інфармацыя аб адкрыцці руху будзе прадастаўлена дадаткова.