Едзем без перасадак…

У Бабруйск прыйшоў першы электрацягнік рэгіянальных ліній

Роўна ў поўдзень падкаціў ён да станцыі Бабруйск, абвясціўшы сваё з’яўленне працяглым гудком.

І вось абвяшчаецца аб адкрыцці мітынгу, прысвечанага важнай падзеі. Паводле слоў міністра транспарту і камунікацый краіны Анатоля Сівака, сёння ўсе мы адчуваем радасныя пачуцці, звязаныя з завяршэннем у рамках маштабнага інвестыцыйнага праекта электрыфікацыі ўчастка чыгункі Асіповічы—Бабруйск. Зроблены яшчэ адзін важкі крок у развіцці новага фармату пасажырскіх перавозак. Тым больш прыемна, што гэта падзея адбылася напярэдадні 50-годдзя з пачатку электрыфікацыі чыгункі ў нашай рэспубліцы. Услед за здадзеным прадугледжана электрыфікацыя ўчасткаў Бабруйск—Жлобін, Жлобін—Гомель, Жлобін—Калінкавічы, Маладзечна—Гудагай—Дзяржмяжа і іншых.

Начальнік Беларускай чыгункі Уладзімір Марозаў адзначыў, што мадэрнізацыя чыгункі, якая зараз вядзецца, павышае канкурэнтаздольнасць унутраных і міжнародных ліній, дае іншую эканомію, зніжае сабекошт прадукцыі. Прамоўца выказаў шчырую ўдзячнасць беларускім спецыялістам і іх кітайскім партнёрам за той унёсак, які яны робяць у рэалізацыю праекта.

Намеснік старшыні Магілёўскага аблвыканкама Анатоль Чорны, кіраўніцтва горада Бабруйска, Бабруйскага і Асіповіцкага раёнаў, якія затым выступілі, гаварылі пра значнасць адкрыцця рэгіянальнай лініі руху электрацягнікоў, што звязала не толькі раёны, але і вобласці, сталіцу з раённымі гарадамі.

Нагадаем, электрыфікацыя Беларускай чыгункі пачалася ў 1963 годзе. На сённяшні дзень ёю ахоплена беларуская частка другога Агульнаеўрапейскага транспартнага калідора на адрэзку Брэст—Мінск—Дзяржмяжа з Расійскай Федэрацыяй, а таксама магістралі ў рамках дзявятага Агульнаеўрапейскага транспартнага калідора ад Маладзечна праз Мінск і да Бабруйска. У цяперашні час з 5,5 тысячы кіламетраў магістральных ліній электрыфікавана 0,9 тыс. км, што складае 16 працэнтаў. Дзяржаўнай праграмай развіцця чыгуначнага транспарту на 2011—2015 гады ставіцца задача давесці гэты паказчык да 25 працэнтаў.