Стартаваў Шосты фестываль беларускамоўнай рэкламы і камунікацыі AD.NAK!

Источник материала:

Стартаваў ужо шосты Фестываль беларускамоўнай рэкламы і камунікацыі AD.NAK! — адна з вельмі важных, і ўжо традыцыйных падзеяў у беларускай культурніцкай і рэкламнай сферах.

Сёлета канцэпцыя фэсту – "Годны шлях рэкламіста". Што гэта мусіць значыць і якімі цікавосткамі будзе адметны сёлетні AD.NAK!, распавялі ягоныя арганізатары.

"Сёння хочацца працытаваць айца Аляксандра Надсана: "Мы не горшыя і не лепшыя за іншыя народы – у нас свая місія", – кажа кардынатар культурніцкай кампаніі "Будзьма беларусамі!" Ніна Шыдлоўская. – Гэтак жа і наш Фестываль – не лепшы і не горшы за іншыя фестывалі і прэміі. Ён мае сваю ўласную місію, якая застаецца нязменнай ужо шэсць гадоў: ператварыць кропкавыя рэкламныя і камунікацыйныя "выскачкі" на тэрыторыю беларускасці ў нармальную штодзённую практыку. Мы спадзяемся, што з часам мова стане нашай паўсядзённасцю, а канцэпцыя асобнага беларускамоўнага фэсту адпадзе як непатрэбная, і мы будзем адзначаць людзей не за якасныя работы на мове, а проста за якасную рэкламу. Чаму нас цікавіць рэклама? Яна штохвілінна ўплывае на нашую свядомасць, хочам мы таго ці не. І вельмі ўзрушвае тое, што паводле сацыялагічных даследаванняў адсотак людзей, якія жадаюць бачыць менавіта беларускамоўную рэкламу, расце – ад 37 адсоткаў у 2009 годзе да амаль 60 у 2014-м.

Сёлетняя канцэпцыя – "Годны шлях рэкламіста": мы хочам паказаць, што за якаснымі працамі на беларускай мове стаяць канкрэтныя людзі. Яны ствараюць беларускую рэкламу, замаўляюць яе, так ці інакш спрычыняюцца да яе".

Як і летась, генеральным партнёрам фэсту стала кампанія velcom, якая вось ужо не першы год стварае беларускамоўны кантэнт.

"Усе нашыя іміджавыя праекты ствараюцца па-беларуску, – расказвае кіраўнік упраўлення маркетынгу кампаніі velcom Юлія Дайнека. – Такія праекты ствараюцца прыблізна два разы на год, і выкарыстанне мовы дае плён – рэдка можна ўбачыць, як людзі глядзяць і рэпосцяць ролікі камерцыйных кампаній, а нашыя ролікі, зробленыя па-беларуску, рэпосцілі. Год таму мы стварылі мабільнае дастасаванне для перакладаў на мову – цяпер ім карыстаецца больш за 30 тысяч чалавек. Літаральна сёння наша кампанія абвясціла новую стратэгію: нацыянальная самаідэнтычнасць будзе нашай ключавой тэмай".

Сёлета Фестываль AD.NAK! уручыць узнагароды ў некалькіх новых паднамінацыях: прадуктовы дызайн, інтэрактыўныя дастасаванні і г.д. Са спісам намінацый і конкурсаў ужо можна азнаёміцца на сайце adnak.by.

"Мы штогод сочым за актуальнымі тэндэнцыямі і сусветнымі трэндамі рэкламнай і камунікацыйнай галіны (узорам для фэсту застаюцца “Канскія львы”), – кажа Сяргей Скараход, кіраўнік праекта Marketing.by, пастаяннага партнёра кампаніі "Будзьма!" у правядзенні фэсту. – Улічваючы іх, мы дапаўняем і абнаўляем намінацыі і конкурсы. Новы сайт Фестывалю сёлета дазваляе канкурсантам максімальна зручна аформіць і падаць работу. Асноўны акцэнт пры падачы работ на сайце зроблены на якасць іх афармлення. Спадзяемся, што сёлетняе новаўвядзенне дазволіць удзельнікам карэктна данесці ідэі сваіх праектаў, а сябрам журы – аб’ектыўна ацаніць працы канкурсантаў. Падчас традыцыйнай адукацыйнай праграмы мы вырашылі выйсці за межы рэкламнай галіны. У гэтым годзе акрамя рэкламістаў спікерамі на адукацыйнай праграме будуць беларускі пісьменнік Віктар Марціновіч, французскі фатограф Жан-Поль Бабано, вядомы рэкламіст Паўліс Сэнюта, наш зямляк Ілля Андрэеў, які цяпер актыўна займаецца рэбрэндынгам "Белавіі". Разам з удзельнікамі яны паразважаюць пра свет вакол нас, у якім мы ўсе разам мусім ствараць і ісці сваім годным шляхам".

Сёлета да фестывалю ў якасці партнёраў далучыліся таксама ААТ “Піўзавод Аліварыя” і група кампаній АЗС "А-100".

"Аліварыя" – найстарэйшы беларускі бровар, нам больш за 150 гадоў, таму казаць пра беларускі складнік натуральна, – кажа Ала Мачалава, менеджар па карпаратыўных камунікацыях ААТ "Піўзавод Аліварыя". – Мы вырашылі, што ўсе камунікацыі кампаніі будуць адбывацца па-беларуску, што ўхвалілі нашыя партнёры з Carlsberg Group. Новыя гатункі піва цяпер цалкам афармляюцца па-беларуску (на гэтым, дарэчы, настойвалі ў тым ліку спажыўцы). І беларуская мова добра спрыяе продажам. Але важна звярнуць увагу, што не ўсё дыктуецца і робіцца толькі дзеля камерцыйнай выгады, ёсць і іншая матывацыя".

Што да сеткі АЗС "А-100", то гэтая кампанія сёлета зрабіла ледзь не ўзорна-паказальны прарыў у папулярызацыі мовы.

"Мы прыватны бізнес з больш як дваццацігадовай гісторыяй, – расказвае Ніна Ніканорава, кіраўнік упраўлення маркетынгу групы кампаній "А-100 АЗС". – Пераход на беларускую мову ў камунікацыях з 1 студзеня – гэта толькі пачатак, да канца года ўсё аздабленне нашых АЗС стане беларускамоўным. З пераходам на беларускую мову да нас далучылася яшчэ модная, сучасная моладзевая аўдыторыя".

Сайт фестывалю adnak.by (традыцыйна ў новым дызайне і з новымі магчымасцямі) працуе ўжо цяпер. Прыём працаў да ўдзелу ў намінацыях і конкурсах Шостага фестывалю пачнецца 20 красавіка. Дэдлайн прыёму работ прызначаны на 1 чэрвеня. А фінальная частка Фестывалю – урачыстая цырымонія ўзнагароджання пераможцаў з папярэдняй адукацыйнай праграмай – пройдзе 2 ліпеня ў Мінску.

Удзел у фэсце, як заўжды, бясплатны, а значыць, ёсць добрая нагода ўжо цяпер пачынаць ці працягваць свой "Годны шлях рэкламіста".