СПОРТ-ТАЙМ

Источник материала:

Яшчэ да адстаўкi Анатоля Байдачнага хадзiлi размовы аб пошуках за межамi нашай краiны новага настаўнiка для нацыянальнай футбольнай зборнай. Хутчэй за ўсё iм можа стаць славацкi спецыялiст Йозэф Хованец, якi ў мiнулым сезоне працаваў у расiйскай «Кубанi». Нагадаем, што зараз выконваючым абавязкi галоўнага трэнера «нацыяналкi» з’яўляецца Юрый Курненiн.

Калачоў у «Растове»

Летась паўабаронца нацыянальнай футбольнай зборнай Цiмафей Калачоў, правы на якога належалi данецкаму «Шахцёру», ужо ездзiў на прагляд у «Растоў», аднак да падпiсання кантракту гэта не прывяло. Днямi хаўбеку гэта ўдалося-такi зрабiць. Дарэчы, у мiнулым сезоне Калачова арандавалi падмаскоўныя «Хiмкi»: у iх саставе беларус правёў 28 матчаў i забiў тры галы.

Хамутоўскi мяняе прапiску

Галкiпер нацыянальнай футбольнай зборнай Васiль Хамутоўскi мяняе прапiску: замест румынскага чэмпiянату ён будзе гуляць у расiйскай прэм’ер-лiзе. Пакуль нельга назваць дакладны клуб, вароты якога стане абараняць беларус, затое вядома сума трансферту варотчыка бухарэсцкай «Сцяуы» — 500 тысяч еўра.

Перамога гаспадароў

Чарговы тур 14-га адкрытага чэмпiянату краiны па хакею з шайбай вызначыўся тым, што ва ўсiх шасцi матчах мацнейшымi на лёдзе аказалiся гаспадары. Узмацнiў сваю пазiцыю лiдар першынства, мiнскае «Юнацтва»: падначаленыя Мiхаiла Захарава з ударным лiкам — 6:1 — засмуцiлi землякоў з «Дынама». Зыход матча памiж магiлёўскiм «Хiмвалакном» i сталiчным «Керамiнам» — 2:1 — прымусiў «драконаў» перамясцiцца з другога на трэцяе месца ў турнiрнай таблiцы. З аднолькавым лiкам завяршылiся сустрэчы кiеўскага «Сокала» супраць наваполацкага «Хiмiка-СКА» i гродзенскага «Нёмана» супраць «Рыгi-2000» — 5:3. «Брэст» перамог лiепайскi «Металургс» — 5:1, а «Гомель» — «Вiцебск» — 4:1. Такiм чынам, у таблiцы лiдзiруюць «Юнацтва» (77 ачкоў), «Сокал» (74) i «Керамiн» (73).

Конкурс на лепшую алiмпiйскую песню

Жыхар кожнай краiны можа мець дачыненне да блiжэйшых летнiх Алiмпiйскiх гульняў: аргкамiтэт «Пекiн-2008» аб’явiў конкурс на лепшую песню аб спаборнiцтвах i валанцёрах. Галоўнае патрабаванне — адпаведнасць накiрункам Алiмпiяды ў Кiтаi, якая павiнна быць экалагiчна чыстай i самай навуковатэхналагiчнай, а таксама дэвiзу Гульняў — «Адзiн свет — адна мара».