Спорт-тайм

Источник материала:

Этап Кубка свету ў Славенii не стаў для нашых страляючых лыжнiкаў паспяховым. У спрынце на 10 кiламетраў лепшы вынiк сярод беларускiх бiятланiстаў паказаў Рустам Валiўлiн, якi фiнiшаваў 25-м сярод 101 удзельнiка. Алег Рыжанкоў — 31, Сяргей Новiкаў — 33, Уладзiмiр Драчоў — 45, Сяргей Дашкевiч — 80, Вiталь Перцаў — 82. Гонку выйграў нарвежац Оле-Эйнар Б’ёрндален.

ГЛЕБ ЯШЧЭ ЗГУЛЯЕ

Леташнi ўладальнiк галоўнага еўрапейскага футбольнага трафея, англiйскi «Лiверпуль», на гэты раз не змог прабiцца нават у чвэрцьфiнал Лiгi чэмпiёнаў, затое змагацца за кубак працягвае англiйскi «Арсенал», за якi выступае наш легiянер Аляксандр Глеб. Дарэчы, у процiстаяннi з iспанскiм «Рэалам» беларус праяўляў сябе даволi актыўна i заменены быў толькi напрыканцы гульнi (на 86-й хвiлiне на яго месца выпусцiлi Бергкампа). У 1/4 фiналу выйшлi партугальская «Бенфiка», французскi «Лiон», iтальянскiя «Мiлан» i «Ювентус», iспанскiя «Барселона» i «Вiльярэал». Вынiкi матчаў у адказ 1/8 фiналу: «Барселона» (Iспанiя) — «Чэлсi» (Англiя) — 1:1, «Ювентус» (Iталiя) — «Вердэр» (Германiя) — 2:1, «Вiльярэал» (Iспанiя) — «Рэйнджэрс» (Шатландыя) — 1:1, «Арсенал» (Англiя) — «Рэал» (Iспанiя) — 0:0, «Мiлан» (Iталiя) — «Баварыя» (Германiя) — 4:1, «Лiон» (Францыя) — «ПСВ» (Галандыя) — 4:0, «Лiверпуль» (Англiя) — «Бенфiка» (Партугалiя) — 0:2. Жараб’ёўка чвэрцьфiнальных i фiнальных паядынкаў запланавана на сёння.

АД ПЕРАМОГI МЕСЦА «БРЭСТА» НЕ МЯНЯЕЦЦА

Калi ў хакей гуляюць сапраўдныя мужчыны, то i здзiўляцца няма чаго, што перанесцi матчы адкрытага чэмпiнату краiны можна было i на мiжнародны жаночы дзень. 8 сакавiка «Брэст» выйграў у свайго галоўнага сапернiка за выхад у плэй-оф — 3:1, але гэта перамога ўжо не дапаможа клубу трапiць у васьмёрку. Мiнскi «Керамiн» расправiўся з аўтсайдарам турнiру «Вiцебскам» — 4:0. Кiеўскi «Сокал» i магiлёўскае «Хiмвалакно» з аднолькавым лiкам — 3:2 — разышлiся адпаведна з латвiйскай «Рыгай-2000» i сталiчным «Юнацтвам». Становiшча каманд пасля 55 тураў: «Юнацтва» — 113 ачкоў, «Керамiн» — 106, «Дынама» i «Сокал» — па 103 (54 матчы), «Хiмвалакно» — 100, «Рыга-2000» — 82 (54 матчы), «Гомель» — 78 (54 матчы), «Неман» — 70, «Брэст» — 69, «Металургс» — 52, «Хiмiк-СКА» — 44, «Вiцебск» — 23. Сёння адбудуцца заключныя сустрэчы першага хакейнага этапу — «Гомель» — «Рыга-2000» i «Дынама» — «Сокал».