Складанасцяў быць не павiнна

Источник материала:

Кватэрнае пытанне

Дз.Я. Кiрэй, г. Полацк.

Як патлумачыў член праўлення грамадскага аб’яднання «Веды» В.В. Савiцкi, у адпаведнасцi з артыкулам 12 Закона «Аб прыватызацыi жыллёвага фонду ў Рэспублiцы Беларусь» асобным катэгорыям грамадзян жылыя памяшканнi перадаюцца бязвыплатна (з улiкам жыллёвай квоты, сумы квот) у адпаведнасцi з заканадаўствам Рэспублiкi Беларусь. Да такiх катэгорый грамадзян пунктам 5 артыкула 12 Закона Рэспублiкi Беларусь «Аб ветэранах» аднесены iнвалiды Вялiкай Айчыннай вайны, якiя маюць права на бязвыплатную перадачу ва ўласнасць ва ўстаноўленым парадку займаемых жылых памяшканняў у межах 20 кв. метраў агульнай плошчы на iнвалiда вайны i кожнага пражываючага разам з iм непрацаздольнага непрацуючага члена яго сям’i з захаваннем прынцыпу аднаразовасцi выкарыстання дадзенай iльготы.

Тая частка жылых памяшканняў, якая перавышае памер агульнай плошчы, што перадаецца бязвыплатна, прыватызуецца на агульных падставах. Пры гэтым доля ўдзелу ў прыватызацыi грашовымi сродкамi вызначаецца па ўзгадненню памiж удзельнiкамi прыватызацыi.

Для набыцця ва ўласнасць займаемага жылога памяшкання ў дамах дзяржаўнага жыллёвага фонду наймальнiк жылога памяшкання, паўналетнiя члены яго сям’i, а таксама iншыя грамадзяне, за якiмi ў адпаведнасцi з заканадаўствам захоўваецца роўнае з наймальнiкам права карыстання гэтым жылым памяшканнем, падаюць заяву аб прыватызацыi ў мясцовы выканаўчы i распарадчы орган альбо ў орган кiравання юрыдычнай асобы, у гаспадарчым распараджэннi або аператыўным кiраваннi якой знаходзiцца жылое памяшканне.

Да заявы аб прыватызацыi, бланк якой выдаецца ў мясцовым выканаўчым i распарадчым органе або органе кiравання юрыдычнай асобы, грамадзяне дадаюць копii дакументаў аб наяўнасцi льгот, чэкi «Жыллё». Копiя асабовага рахунка наймальнiка, даведка (выкапiроўка з плана) аб тэхнiчных характарыстыках кватэры, якая прыватызуецца, выпiска са спецыяльнага чэкавага рахунка i iншыя дакументы, неабходныя для прыняцця рашэння па заяве, запытваюцца i атрымлiваюцца мясцовым выканаўчым i распарадчым органам або органам кiравання юрыдычнай асобы ў адпаведнасцi з Указам Прэзiдэнта Рэспублiкi Беларусь ад 13 верасня 2005 г. № 432 «Аб некаторых мерах па ўдасканальванню арганiзацыi работы з грамадзянамi ў дзяржаўных органах, iншых дзяржаўных арганiзацыях».

Рашэнне па заяве аб прыватызацыi жылога памяшкання дзяржаўнага жыллёвага фонду прымаецца мясцовым выканаўчым i распарадчым органам або органам кiравання юрыдычнай асобы, у гаспадарчым распараджэннi або аператыўным кiраваннi якой знаходзiцца жылое памяшканне, у двухмесячны тэрмiн з дня падачы заявы аб прыватызацыi.

Пры прыватызацыi жылых памяшканняў грамадзянамi, якiя маюць падставы для льготнай перадачы iм жылля ва ўласнасць, у рашэннi выканаўчых i распарадчых органаў, органаў кiравання юрыдычных асобаў указваецца, што ўдзельнiкам прыватызацыi займаемыя жылыя памяшканнi перадаюцца ў роўных долях. Калi плошча займаемых жылых памяшканняў перавышае плошчу, якая перадаецца бязвыплатна, памеры грашовых даплат указваюцца ў дагаворы перадачы (продажу) кватэр ва ўласнасць грамадзян асобна па кожнаму ўдзельнiку прыватызацыi.

Больш падрабязную iнфармацыю аб парадку i ўмовах прыватызацыi канкрэтнага жылога памяшкання можна атрымаць у адпаведнай службе гарвыканкама па месцы жыхарства. Адмова мясцовага выканаўчага i распарадчага органа, юрыдычнай асобы, у гаспадарчым распараджэннi або аператыўным кiраваннi якой знаходзяцца жылыя памяшканнi, у прыватызацыi жылых памяшканняў у дамах дзяржаўнага жыллёвага фонду можа быць абскарджана грамадзянамi ў судовым парадку. Спрэчкi, звязаныя з прыватызацыяй жылых памяшканняў, вырашаюцца вышэйстаячым у парадку падпарадкаванасцi органам (у залежнасцi ад прыналежнасцi жылога дома, у якiм размешчана кватэра) альбо судом.