Дзяржава прымушае тэатры выконваць план платных паслуг

Источник материала:

Дырэкцыя тэатраў у шокавым стане: ім давялі новы план па платных паслугах, які выканаць нават пры загружанасці залы ў 93% проста немагчыма. Тэатры ўжо падлічылі, каб стаць самаакупнымі, квіткі на спектаклі павінны быць па 70 тысяч рублёў.
У студзені ніводзін тэатр не выканаў гэтага плана, за што на іх і абрынулася крытыка з беларускага тэлебачання. Справа ў тым, што з Новага года ўрад давёў да Міністэрства культуры новы план платных паслуг, а міністэрства, у сваю чаргу, накіравала яго ва ўсе тэатры краіны. Дзяржава прымушае тэатры “круціцца” і вучыцца зарабляць уласныя грошы. Па словах намесніка дырэктара па агульных пытаннях Нацыянальнага акадэмічнага Вялікага тэатра оперы РБ Аляксандра Пятровіча, такі план існаваў і раней, але не быў настолькі завышаным.

Аляксандр Пятровіч: "Сама абсурднасць заключаецца ў тым: што такое платныя паслугі для прафесійнага калектыву, які займаецца маральным выхаваннем насельніцтва? Мы ж не венікі вяжам, не ў лазню водзім людзей, мы ж не гузікі прышываем. Мы ствараем нацыянальнае мастацтва, і мы не можам узняць зараз кошт на квіткі".

Аляксандр Пятровіч кажа "Еўрарадыё", што калі квіткі стануць даражэй, тады ўвогуле ніхто не захоча ісці ў тэатр. Адміністрацыя тэатра не можа даць 100% гарантыі, што ў наступным месяцы яны змогуць давесці гэты план, і на гэта ёсць аб’ектыўныя прычыны. Тэатр оперы аказаўся ў няпростай сітуацыі: у яго няма сваёй пляцоўкі, але ёсць план платных паслуг. У рынкавай сітуацыі, дзе кожны сам за сябе, вядучаму тэатру ў прадастаўленні канцэртнай пляцоўкі ўжо адмовіла філармонія і тэатры на перыферыі, бо яны таксама “гоняцца” за паказчыкамі.

Аляксандр Пятровіч: "У нас увогуле катастрафічная сітуацыя: сцэнічны комплекс у нас у Доме афіцэраў, даты правядзення нашых спектакляў вызначае сам Дом афіцэраў, у залежнасці ад іх вольнага часу. Акрамя таго, болей за 9 дзён мы там не можам працаваць. Іншая сітуацыя з філармоніяй - мы кожны месяц працавалі там па 3 канцэрты. Але ў сувязі з тым, што філармоніі даведзены такі ж план, яна зараз не зацікаўлена ў рэалізацыі нашых квіткоў. І трэцяе, мы працуем на выязных гастролях у іншых абласцях, але ім таксама даведзены ўнушальны план, і яны ўжо зараз нам пачынаюць адмаўляць у прадастаўленні пляцоўкі".

Такая ж сітуацыя з невыкананнем плана платных паслуг і ў Нацыянальнага акадэмічнага драматычнага тэатра імя Горкага. Дырэктар тэатра Эдуард Герасімовіч прызнаецца Еўрарадыё, што новы план, які давялі ў пачатку 2008 года, нерэальны для тэатра і нават пры загрузцы залы на 93% у студзені, яны не змаглі яго выканаць.

Эдуард Герасімовіч: "Раней план па платных паслугах быў меншы, а зараз ён вялікі. З 1 студзеня новы план - на мой погляд, ён завышаны нашмат. Так, мы таксама не выканалі па студзеню план. Хоць загрузка маёй залы ў студзені склала 93%. Гэта вельмі высокая загрузка, і тым не менш мы не выканалі план".

Якую суму неабходна зараз тэатру зарабляць кожны дзень, Эдуард Герасімовіч не захацеў называць для Еўрарадыё. Ён упэўнены, што ў мінулым месяцы драматычны добра спрацаваў, пры тым, што не на ўсіх спектаклях была цалкам запоўненая зала.

Эдуард Герасімовіч: "Ёсць спектаклі, дзе зала (па вядомых прычынах) не можа загружацца на 100%: ці то яна арматызаваная, ці спектакль носіць не забаўляльны характар, а складаны для ўспрымання гледача. Канешне, там 100%-й загрузкі залы дабіцца немагчыма. І адсюль па месяцы ўзнікае пэўны дэфіцыт. Ёсць спектаклі на аншлагах, а ёсць спектаклі, загрузка якіх 50-70%. Гэта не ад таго, што там дрэнныя артысты ці дрэнны спектакль, а праз розныя прычыны".

У студзені Нацыянальны акадэмічны тэатр імя Янкі Купалы таксама не змог здужыць плана па платных паслугах. Генеральны дырэктар тэатра Мікалай Кірычэнка кажа "Еўрарадыё", што гэта выйшла не па халатнасці, а з паважных прычынаў.

Мікалай Кірычэнка: "У нас у Народнага артыста Беларусі Памазана інфаркт, траўма ў вядучай актрысы Зелянкоўскай, і нам прыйшлося рабіць мноства замен, змены ў рэпертуары, а кожная замена - гэта здача квіткоў гледачамі".

Мікалай Кірычэнка кажа "Еўрарадыё", што план па платных паслугах зусім не азначае, што тэатр павінен стаць самаакупным, бо, на яго думку, тэатр - гэта стратная справа, калі глядзець з матэрыяльнага боку. І тым не менш, Купалаўскаму прапаўновалі разгледзець сітуацыю, у якой тэатр пачне самастойна зарабляць грошы.

Мікалай Кірычэнка: "Такая задача самаакупнасці нам не ставілася, нам толькі прапаўновалі разгледзець гэта пытанне. Тэатр - першапачаткова стратнае мерапрыемства. Мы падлічылі, колькі трэба, каб выйсці на самаакупнасць, тады квіткі павінны быць каля 70 тысяч. Тады мы страцім вялікую колькасць гледачоў, якія не змогуць сабе дазволіць схадзіць у тэатр".
Па каментар Еўрарадыё звярнулася ў эканамічнае ўпраўленне Міністэрства культуры, якое давяло план тэатрам па платных паслугах, але там увогуле адмовіліся гаварыць на гэтую тэму.
Кацярына Ярмалаева