"Кастрычніцкая" можа быць зачынена да лістапада

Источник материала:

Днямі на форуме Мінскага метрапалітэна з’явілася інфармацыя, што ўкраінцы адмовіліся дапамагаць беларусам у рамонце станцыі “Кастрычніцкая”. Прычына ў тым, што мы, нібыта, “зажалі бабкі”. Але, як даведалася "Еўрарадыё", справа не ў грошах. Украінскія спецыялісты ўпэўненыя, што за такі тэрмін працу выканаць немагчыма.

Нагадаем, што станцыя метро “Кастрычніцкая” цалкам зачынілася для пасажыраў 9 чэрвеня. Цяпер пад зямлёй дэмантуюцца тры старыя эскалатары і ўсталёўваецца новы, вытворчасці “Крукаўскага вагонабудаўнічага завода” (Украіна). Скончыць рамонт планавалася да 1 верасня. Але спецыялісты з Украіны такі тэрмін лічаць нерэальным. Таму, па іх словах, і не прыехалі дапамагаць.

Крукаўскі вагонабудаўнічы завод: “Нас запрашалі, але ў нас з’явіліся іншыя замовы. Мы папярэджвалі — калі б гэтыя тэрміны былі ўзгодненыя раней, можна было б і пачынаць раней… А так, нават сёння няма ніякай канкрэтыкі, усё толькі вырашаецца, а тэрмін застаецца ранейшым - 1 верасня. Тыя тэрміны, якія заклалі (3 месяцы), яны проста нерэальныя”.

Па падліках кіеўскага метрапалітэна, рэканструкцыя, як мінімум, павінна працягнуцца да лістапада: “Кіеўскі метрапалітэн падлічваў і даваў свае рэкамендацыі. Пры ўсім аб’ёме прац гэта выходзіла 4,5-5 месяцаў”.

Прадстаўнік Крукаўскага вагонабудаўнічага завода патлумачыў "Еўрарадыё" спецыфіку працы. І расказаў, чаму, па яго меркаванні, укласціся да 1 верасня нерэальна.

“Вось глядзіце - чэрвень, ліпень, жнівень. Трэба дэмантаваць усе эскалатары. Спачатку трэба падрыхтаваць для гэтага плошчы… Станцыя, значыцца, закрытая, працы выконваюцца толькі ўначы. Пакуль ідуць толькі падрыхтоўчыя працы, пасля будзе праводзіцца дэмантаж старых эскалатараў. Ізноў, вываз толькі ўначы.

Пасля будзе цалкам прыбірацца стары падмурак, гэта таксама час. Пасля гэтага закладваецца новы падмурак. А падмурку, як вы разумееце трэба выстаяцца - застыць, прыняць свае формы… Гэта таксама час…

Эскалатары старыя трэба не проста паламаць і выкінуць на смецце. Іх трэба ахайна дэмантаваць, усё гэта раскласці і вывезці, каб далей іх можна было дзесьці выкарыстоўваць", - кажа спецыяліст.

Рэканструкцыяй станцыі “Кастрычніцкая” займаецца УП “Мінскметрабуд”. Досведу па дэмантажы эскалатараў арганізацыя не мае. Беларускіх будаўнікоў, вядома, не па сваёй волі паставілі ў такія ўмовы. Таму іх нежаданне каментаваць тэрміны, зразумелае. Кажуць, што на такі аб’ём прац патрэбны год, а не тры месяцы.

“Мінскметрабуд”: “Я б увогуле не хацеў выносіць усю гэтую справу на абмеркаванне грамадскасці. Не трэба нічога каментаваць. Напішыце лепш пра пасяўную ці пра ўборачную.

Усе хочуць чужымі рукамі за тыдзень зрабіць працу, якую трэба выконваць год. Як быццам бы ўсё звалілася з неба… як хатабыч, пацягнуў за валасок і ўсё атрымалася…”

Первоисточник: