Каля тысячы законапраектаў

Источник материала:

— Асаблiвасцю гэтай сесii з’яўляецца тое, што сёлета мы як нiколi рана атрымалi два асноўныя дакументы — праект бюджэту нашай дзяржавы на чарговы каляндарны год i ўнясенне змяненняў у дзеючае па-датковае заканадаўства, — адзначыў старшыня Палаты прадстаўнiкоў Вадзiм Папоў падчас сустрэчы з журналiстамi. — Яны маюць высокую ступень гатоўнасцi, у дэпутатаў мелася магчымасць дэталёвай прапрацоўкi гэтых дакументаў. I так званае "нулявое" чытанне з удзелам усiх камiсiй у Палаце прадстаўнiкоў адбылося.

Спiкер нiжняй палаты падкрэслiў, што фармiраванне бюджэту сёлета iшло лягчэй, паколькi ўрад спрагназаваў, што прырост ВУП у 10—12 працэнтаў рэальны. Гэта паслужыла добрай асновай для таго, каб пачаць пралiчваць бюджэт. Вадзiм Папоў нагадаў таксама, што бюджэт-2009 захавае сацыяльную накiраванасць, будзе арыентаваны на абарону малазабяспечаных слаёў насельнiцтва. А сярэднi заробак да канца наступнага года перасягне 550 долараў ЗША — так прадугледжана ў бюджэце.

Адказваючы на пытаннi журналiстаў аб новым складзе парламента, В. Папоў адзначыў, што колькасць парламентарыяў-жанчын павялiчылася (у чацвёртым склiканнi iх будзе 35). Такiя змены ў гендарным складзе, на яго думку, дабратворна паўплываюць на работу парламента. "30 дэпутатаў мiнулага склiкання кансалiдуюць наноў абраных на канструктыўную работу ў парламенце", — заўважыў старшыня Палаты прадстаўнiкоў. Ён зрабiў акцэнт на тым, што важныя i захаванне пераемнасцi ў парламенце, i абнаўленне складу. Iнакш пачынаюцца негатыўныя з’явы — застой, выпрацоўка стэрэатыпаў, нежаданне шукаць новыя рашэннi. А трох дзясяткаў "старажылаў", на яго думку, дастаткова для перадачы неабходнага вопыту. Якi ж далейшы лёс дэпутатаў трэцяга склiкання, якiя не перакачавалi ў новы парламент? Iх паўнамоцтвы да першага дня пасяджэння новай палаты не складзеныя, а пасля таго пачнецца работа па iх працаўладкаваннi — запэўнiў Вадзiм Папоў i дадаў: "Працоўных месцаў для дэпутатаў у нашай краiне дастаткова".

Яшчэ адзiн бюджэт-2009 — ужо Саюзнай дзяржавы — будзе разгледжаны цяперашнiм складам Парламенцкага сходу Саюза Беларусi i Расii 16—17 кастрычнiка на сесii ў Маскве. Дарэчы, наша супрацоўнiцтва з Расiяй на рэдкасць плённае. I лепшае таму сведчанне — аб’ём узаемнага таваразвароту. Старшыня Палаты прадстаўнiкоў упершыню агучыў прагноз яго росту да 40 млрд долараў ЗША сёлета. Вадзiм Папоў прывёў для параўнання леташнi паказчык — 26 млрд долараў. Як бачыце, рост вельмi iстотны i iмклiвы. Увогуле Беларусь супрацоўнiчае са 173 краiнамi свету. Таму так важна надаваць увагу мiжнародным пагадненням: "гэта дасць магчымасць нашым прадпрыемствам прасоўваць свае тавары на замежным рынку, ствараць сумесныя прадпрыемствы, атрымлiваць прыбыткi", — падкрэслiў старшыня Палаты прадстаўнiкоў. На яго думку, ацэнка назiральнiкамi АБСЕ парламенцкiх выбараў не пашкодзiць мiжпарламенцкаму супрацоўнiцтву Беларусi з iншымi краiнамi. "Калi аб’ектыўна глядзець на гэтыя працэсы, то спадарыня Лiзэн i iншыя прадстаўнiкi выказалi шмат станоўчага аб тым, што ўжо зроблена ў рэспублiцы i працягвае рабiцца. Таму нiякiх сумненняў, асцярог, што працэс супрацоўнiцтва можа парушыцца, абсалютна няма. Наадварот, пашырэнне супрацоўнiцтва ёсць. I нiякiх сумненняў у тым, што i надалей яно будзе пашырацца, быць не павiнна", — рэзюмаваў спiкер нiжняй палаты.