Беражыся аўтамабiля, за рулём якога п'яны

Источник материала:

Беражыся аўтамабiля, за рулём якога п'яны

Субота — самы небяспечны дзень для кожнага, хто нават мiжволi становiцца ўдзельнiкам дарожнага руху. Такi вынiк можна зрабiць на падставе аналiзу, праведзенага дзяржаўнай аўтаiнспекцыяй УУС Гомельскага аблвыканкама. Яно i зразумела: менавiта ў суботу мы расслабляемся пасля цяжкага тыдня. А тым часам пiльнасць, уласцiвая ў iншыя днi, адыходзiць кудысьцi ўбок. Сiтуацыя пачынае змяняцца да горшага ўжо ў пятнiцу, калi пасля адносна спакойных серады i чацвярга адбываецца больш ДТЗ, а ў суботу яна дасягае пiку. Мiж iншым, у нядзелю паводзiны вадзiцеляў i пешаходаў на дарозе таксама не вельмi дысцыплiнаваныя. Так i становяцца выхадныя днi самымi "ўраджайнымi" на дарожныя ахвяры.

Што датычыцца гадзiн, тут таксама ёсць зразумелыя заканамернасцi. Менш за ўсё аварый адбываецца ранiцай — да 11.00, а вось пасля поўдня паступова здарэнняў становiцца больш. Рэзка пагаршаецца сiтуацыя на дарозе пасля 17 гадзiн. Пакуль большасць з вадзiцеляў не загоняць сваiх жалезных коней у гаражы (гэта прыкладна да 23 гадзiн), не трэба страчваць пiльнасць. Мiж тым, статыстыка сведчыць i яшчэ аб адным пiку аварыйнасцi на дарогах — пасля гадзiны ночы. Вiдаць, у гэты момант пачынаюць дэманстраваць зухаватасць тыя аўтааматары, якiм ужо мора па калена — да дзвюх ночы, пакуль нарэшце не знойдуць прыгоды на сваю галаву...

— 5-гадовае дзiця загiнула сёлета ў Калiнкавiцкiм раёне. Яго збiў супрацоўнiк сiлавых структур непасрэдна ў населеным пункце. Ён наехаў на маленькага веласiпедыста, якi рухаўся па абочыне. Вiноўнiк аварыi знiк з месца здарэння. У ходзе пошукавых мерапрыемстваў вадзiцель быў устаноўлены — ён адпачываў дома. Экспертыза пацвердзiла, што ў момант здарэння грамадзянiн быў у нецвярозым стане.

Адказнасць за падобнае кiраванне машынай — вельмi жорсткая. Тым не менш сёлета ў Гомельскай вобласцi 4482 вадзiцелi былi затрыманы ў стане алкагольнага ап'янення за рулём. За паўторнае кiраванне транспартным сродкам ў нецвярозым стане даведзены ўжо крымiнальныя справы ў дачыненнi да 334 вадзiцеляў. Менавiта так, у апошнiм выпадку наступае не адмiнiстрацыйная, а крымiнальная адказнасць. Яна цягне за сабой да 6 месяцаў папраўчых работ або штраф да 1000 базавых велiчынь. Супрацоўнiкi ДАI сцвярджаюць, што суд сёння на справе, а не толькi ў тэорыi прымяняе санкцыi, якiя палягчаюць кiшэню парушальнiкаў дарожнага руху на 20 мiльёнаў рублёў.

I яшчэ адна акалiчнасць. Сёлета ў вобласцi за ваджэнне аўтамабiля ў нецвярозым стане былi затрыманы 23 адказныя асобы. Адзiн з чыноўнiкаў кiраваў аўтамабiлем не толькi п'яны, але i пазбаўлены раней вадзiцельскага пасведчання па той жа прычыне. У дачыненнi да яго заведзена крымiнальная справа. Сярод тых, хто пад добрым градусам садзiўся за руль, заўважаны кiраўнiкi розных устаноў, напрыклад: загадчык кафедры Гомельскага медыцынскага ўнiверсiтэта, камандзiр узвода лiцэя МНС, спецыялiст транспартнай iнспекцыi. Кiраўнiк адной з ПМК вобласцi п'яны кiраваў службовым аўтамабiлем. Штодзень супрацоўнiкi ДАI затрымлiваюць у сярэднiм 30—35 нецвярозых вадзiцеляў.

Мiж iншым, што датычыцца яшчэ адной з самых распаўсюджаных прычын здарэнняў на дарозе — перавышэнне хуткаснага рэжыму, кiраўнiцтва ДАI папярэджвае: дарожнае брацтва ў выглядзе перамiгвання фарамi становiцца неактуальным — сёння мiлiцыя аснашчана такой апаратурай, якая здольная "засекчы" перавышэнне хуткасцi там, дзе парушальнiкi менш за ўсё чакаюць.Iрына АСТАШКЕВIЧ.

Фота аўтара.