Главная
Гороскопы
"Інтэлектуалка" зарабляла на школьнiках-падарожнiках"Інтэлектуалка" зарабляла на школьнiках-падарожнiках Як нас дураць У Вiцебску прадпрымальная жанчына 1955 года нараджэння, якая кiруе iнтэлектуальным клубам у абласным аб'яднаннi пазашкольнай работы з дзецьмi i падлеткамi, на 52 мiльёны "кiнула" сваiх гадаванцаў i iх бацькоў. Такiх крымiнальных прыкладаў раней у Вiцебску не было. Дзецi i iх бацькi рыхтавалiся пры яе дапамозе адправiцца за мяжу на адпачынак у аздараўленчыя лагеры. Не атрымалася. Пры гэтым некаторыя зноў былi вымушаны заплацiць за турыстычную паездку. Як паведамiў карэспандэнту "Звязды" начальнiк раённага аддзела ўнутраных спраў Чыгуначнага раёна Вiцебска Сяргей Блажэвiч, у аддзел мiлiцыi напрыканцы чэрвеня звярнулiся па дапамогу бацькi разам з дзецьмi, якiя вучацца ў дзвюх вiцебскiх гiмназiях. Яны растлумачылi, што напрыканцы мая перадавалi грошы сваiм педагогам для паездкi ў Чэхiю i Iталiю. Падчас праверкi мiлiцыянеры выявiлi, што кiраўнiца iнтэлектуальнага клуба "Вiкторыя" (ва ўстанове адукацыi жанчына працуе вось ужо 15 гадоў, а ў свой час скончыла вучылiшча мастацтваў) па сваёй iнiцыятыве на працягу вось ужо дзесяцi гадоў арганiзоўвала паездкi дзяцей, якiя вучацца ў вiцебскiх школах i гiмназiях, у Чэхiю i Iталiю. Кошт паездкi для дзiцяцi складаў 365 еўра плюс 110 тысяч беларускiх рублёў — транспартныя паслугi да беларускай мяжы. I яшчэ 3 долары — гэта медыцынская страхоўка. Таксама з дзецьмi маглi паехаць i бацькi. Але яны ўжо павiнны былi заплацiць 465 еўра i адпаведна таксама трэба было аплацiць страхоўку i праезд да мяжы. Сёлета збiралiся такiм чынам некалькi груп з некалькiх школ i гiмназiй абласнога цэнтра. Ахвотных паехаць "iнтэлектуалка" шукала з дапамогай сваiх знаёмых настаўнiкаў. Педагогi распаўсюджвалi iнфармацыю, збiралi грошы i перадавалi "iнтэлектуалцы". I бацькi прыносiлi грошы прама ёй на працу. Тая ў сваю чаргу праз мiнскую турфiрму арганiзоўвала паездкi: адвозiла грошы, афармляла вiзы. Паралельна "прадпрымальнiца" займалася камерцыйнай дзейнасцю — мела гандлёвыя пункты ў папулярным вiцебскiм гандлёвым цэнтры (займалася продажам жаночага адзення). Прадпрымальнiцтва, дарэчы, аформiла на сваiх сыноў. Летась у яе з'явiлiся праблемы з выплатай крэдытаў розным банкам — усяго болей як 10 банкам. Яна у адным банку брала грошы, у другiм аддавала. У маi сабрала каля 52 мiльёнаў рублёў у навучэнцаў i бацькоў. Падумала, што за месяц зможа разлiчыцца, а грошы "заклала" ў банкi, каб пагасiць крэдытныя запазычанасцi. За некалькi дзён да паездак у школах арганiзавалi бацькоўскiя сходы. Але арганiзатар паездак на iх не прыйшла... Усяго падчас мiлiцэйскай праверкi ўстанавiлi 35 пацярпелых, з iх 27 — вучнi. Заведзена крымiнальная справа. За свае дзеяннi "iнтэлектуалка" можа быць пазбаўлена волi на тэрмiн ад 3 да 12 гадоў з канфiскацыяй маёмасцi. Цiкава, што яшчэ 60 мiльёнаў махлярка павiнна банкам. Падатковай iнспекцыi давядзецца ўстанавiць — цi законна наогул арганiзоўвалiся "прадпрымальнiцай" паездкi. Мiлiцыянеры ўжо вызначылi, што на 10—15 еўра кошт пуцёўкi ў самой мiнскай фiрме таннейшы. Гэтыя грошы без ведамасцяў i распiсак "прадпрымальнiца" прысвойвала сабе. Як адзначыў начальнiк РАУС, шэраг крымiнальных спраў будуць заведзены па факце падачы ў банкi фальшывых даведак аб даходах. Афармлялiся даведкi i на "iнтэлектуалку", i на сваякоў, i на тых, хто гарантаваў банкам вяртанне крэдытаў. Цiкава, што 19 навучэнцам i iх бацькам давялося паўторна заплацiць грошы за адпачынак. Вiзы ў iх былi ўжо адкрыты. Аляксандр ПУКШАНСКI. |