"Героі 2016 года": названы пераможцы беларускай музычнай прэміі

Источник материала:

У клубе «Грай» ушанавалі ўладальнікаў музычнай прэміі ад парталу Tuzin.fm.

«Адкрыццём году» у беларускай музыцы названы гурт Intelligency.

Музыка Усевалада Доўбні і Юрыя Тарасевіча належыць да стылю «тэхна-блюз», які спалучае электронную і гітарную музыку. Летась музыкі былі названыя «Надзеяй году».

Сёлета яны выпусцілі беларускамоўны міні-альбом «Мова», выступалі ў Мінску на фэсце вулічнай музыкі, з сольнымі канцэртамі ў Беларусі, а таксама за мяжой: гурт прайшоў адбор «Басовішча», трапіў ў лайн-ап Halfway Festival у Польшчы, «Джаз Коктебель» і «Файне місто» ва Украіне.

У намінацыі «Героі году» перамог гурт Vuraj. Яго лідар Сяргей Доўгушаў быў дадаткова адзначаны за грамадскую актыўнасць.

Сяргей вядомы таксама як вядоўца «Спеўных курсаў», а яшчэ як музычны менеджар. На рахунку Доўгушава-арганізатара два сур’ёзныя праекты — «Песні і найгрышы вяселля вёскі Лявонпаль і яе наваколляў» і «Песні матчыны з Вушаччыны». Разам з Vuraj музыка няспынна эксперымэнтаваў - на Новы год быў прэзентаваны дуэт з CherryVata, вясной — супольны рок-гіт з Re1ikt, а на адным з канцэртаў Доўгушаў наогул выступіў вакалістам «рэліктаў».

Што тычыцца гурта, у пачатку года яны выдалі сінгл «Святы вечар», дзе заклікалі падзяляць народныя песні на паганскія і хрысціянскія. А ўвосень выйшаў сінгл «Ой, лятала» — музыкі апрацавалі і запісалі ўлюбёную песню Рыгора Барадуліна. Узімку прэзентавалі яшчэ адну новую песню — «Łastovka».

Таксама былі ўзнагароджаны гурт Irdorath — за «Песню году» і «Альбом году» ды гурт Rahis за «Кліп году».