Апублікавана песня, якая не ўвайшла ў "Народны альбом"

Источник материала:

На канале Tuzin.fm на Soundcloud прэзентаваны спеў «Коленька».

Гэты твор быў запісаны 20 гадоў таму падчас студыйнай сесіі «Народнага альбому» на радыё 101,2 разам з «Надзенькай», але ў фінальную версію не ўвайшоў.

Аўтары канцэпцыі праекту Міхал Анемпадыстаў і Лявон Вольскі палічылі спеў пра «Коленьку» пераборам. «Дзве аднатыпныя песні вырашылі не ставіць. Да таго ж там пра немцаў, а ў альбоме падзеі адбываюцца трохі раней», — тлумачыць Лявон, але прызнаецца, што ў той час гэтыя творы як пра Надзеньку, так і пра Коленьку яго моцна ўразілі, як прыклады «беларускага наіўнага мастацтва».

Абодва гэтыя творы выканаў Мікола Трус, на той час дырэктар музея Максіма Багдановіча. Ён пажадаў, каб яго імя не раскрывалі і падпісалі ў «Народным альбоме», як «Інкогніта». Упершыню публічна сваё імя Трус раскрыў у фільме «Ненаўмысны шэдэўр» і расказаў пра абставіны запісу.