З выявамі гістарычных асоб. У Гродне прэзентавалі адноўленыя карты Лапіных

Источник материала:

Прэзентацыя новых ігральных карт Лапіных прайшла ў суботу 8 ліпеня ў Новым Замку. Яшчэ два гады таму ніхто не мог падумаць, што ў Гродне пачнуць аднаўляць старыя ігральныя карты Лапіных, якiя выпускалiся ў горадзе да Другой сусветнай вайны. Але праз час, дзякуючы актыўным дзеянням гродзенцаў, а менавiта творчаму згуртаванню «А-Чатыры», карты атрымалася не толькі аднавіць, але і пусціць у продаж, паведамляе hrodna.life.

Спецыяльна да прэзентацыі новых карт гісторыкам Андрэем Вашкевічам была падрыхтавана выстава з унікальнымі экспанатамі, якія звязаныя з друкаванай вытворчасцю ў Гродне, а таксама выпускам карт. На прэзентацыі быў паказаны і фільм Наталлi Шматко пра традыцыi друку на Гродзеншчыне и пра тое, як ствараліся новыя ігральныя карты Лапіных. А вось сюрпрызам мерапрыемства стаў выступ ілюзіяніста.

«Сёння першае і самае важнае, гэта тое, што гродзенцы змаглi дакрануцца да гісторыi, адчуць рух часу ўласнаруч, — кажа галоўны стваральнiк новых карт Антон Янкоўскi. — Усе, хто наведалi прэзентацыю, не толькі змаглi ўбачыць i набыць карты, якія мы аднавiлі, а таксама яны маглі паглядзець на арыгіналы карт, якія друкаваліся амаль як стагоддзе таму».

Унікальныя карты пачалі выпускаць у Гродна напачатку мінулага стагоддзя. Іх вытворчасць пачалася ў 1923 годзе ў Гарадзенскай літаграфіі братоў Аляксандра і Абрама Лапіных. Гарадзенскія калоды атрымалі велізарную папулярнасць сярод гараджан, а таксама заезджых гульцоў і калекцыянераў, а літаграфія атрымала назву «Першай нацыянальнай фабрыкі ігральных карт». За аснову друку на фабрыцы была ўзята тэхналогія і стандарты, закладзеныя яшчэ ў XVIII стагоддзі Антоніем Тызенгаўзам. Гарадзенскія ігральныя карты былі вядомыя сваёй якасцю, прыгажосцю, арыгінальнасцю і разнастайнасцю. У некаторых калодах замест масцяў красаваліся жалуды і званочкі, а замест простых малюнкаў каралёў - сапраўдныя гістарычныя асобы. Напрыклад, Стэфан Баторы, ці каралі Жыгімонт Аўгуст ды Казімір Вялікі. У асартыменце былі «народныя» калоды з выявамі шляхты часоў Рэчы Паспалітай замест каралёў і валетаў, «прускія», «барочныя», у годы нямецкай акупацыі на фабрыцы Лапіных друкаваліся «рэйнскія» ігральныя карты. Браты Лапіны загінулі ў вайне, а у 1944 годзе вытворчасць карт на фабрыцы была спынена. Там пачалі друкаваць савецкія агітацыйныя плакаты. Пазней праца гарадзенскай друкарні ўвогуле прыпынілася.

Новыя карты, можна сказаць, ствараліся з нуля. Жонка Антона Наста малявала з арыгіналаў кожную карцінку, а пасля працавала з ёй на кампутары.

«Самае цікавае, калі мы ўзяліся за аднаўленне карт, стала паступаць усё больш і больш інфармацыі. Як быццам карты чакалі таго моманту, калі за іх возьмуцца. Бо да знаходкі гэтых картаў, у горадзе пра іх амаль нічога не было вядома. У той момант, калі мы ўжо распрацавалі ўласную каробку і пусцілі карты на вытворчасць, знайшлася і цэлая арыгінальная калода, якую трымаў сам ўладальнік фабрыкі Аляксандр Лапін. Праект па аднаўленню быў цікавы і мы рады што за яго ўзяліся. Ёсць верагоднасць, што ў будучыні выпусцім карты і іншага выгляду, бо у Лапіных іх было некалькі варыянтаў», дадаў Антон.

Ілюзіяніст Рыгор Нікіфараў, які на прэзентцыi паказваў фокусы з новымi картамі, адзначыў сучасную прадукцыю, як якасны прадукт з незвычайнай энергетыкай.

«На прэзентацыі я патрымаў у руках як старыя карты Лапіных, так і новыя. Адчуваю, што ў гэтых карт ёсць гісторыя, а зараз — і будучыня. Па старых картах магу сказаць, што энергетыка ад іх зыходзіць сур’ёзная, адчуваецца, што яны пабывалі ў розных руках, и добрых, і дрэнных. Прадукт вельмі якасны. Новыя карты не горш за старыя і мне з імі ўдалося ўжо папрацаваць, адчуваецца таксама незвычайная энергетыка».

Яшчэ да прэзентацыі, новыя карты Лапіных паступілі ў продаж у краме «Кубік». Першыя некалькі тыдняў калоду новых карт можна будзе набыць усяго за 5 рублёў