Як мала трэба для шчасця

Источник материала:

Толькi адна бутэлька гарэлкi. Каб яе здабыць, 37-гадовы жыхар вёскi Хутар Светлагорскага раёна разам з неўстаноўленым пакуль сябрам днём зайшлi ў вясковую краму ААТ "Дружба" i адкрыта выкралi так неабходную iм вадкасць маркi "Радамiр". Заведзена крымiнальная справа.

Нi сабе нi дзецям

Глыбокай ноччу была падпалена надзiманая горка для дзяцей, якую прыватны прадпрымальнiк устанавiў побач з Прудкоўскiм рынкам у Гомелi. На ноч яе звычайна здзiмалi, але пакiдалi на тым жа месцы. Каму не спадабаўся бiзнэс, цi гэта было звычайнае хулiганства — высвятляе цяпер мiлiцыя.

Ірына АСТАШКЕВIЧ.

Скралi тону дроту — вынеслi цi вывезi?

Ноччу з тэрыторыi, якая належыць Баранавiцкаму аддзяленню чыгункi, нехта выкраў тону меднага дроту. Тэрыторыя ахоўваецца, а непадалёк знаходзiцца аддзел транспартнай мiлiцыi. Тону металу на руках не вынесеш, i цяпер мiлiцыя высвятляе, хто паспрыяў вывазу той медзi.

Што аб'ядноўвае тры пыласосы i парфуму? Крадзеж!

Прадавец крамы в. Моўчадзь (Баранавiцкi раён) заявiла ў мiлiцыю, што нехта, вырваўшы прабой навяснога замка, выкраў 3 пыласосы, вопратку, парфуму... Аператыўнiкi на месца крадзяжу прыехалi са службовым сабакам, якi i прывёў iх да злодзея — мясцовага жыхара.

Прыклалi рукi

У Пiнску двое навучэнцаў каледжа выпiлi i пайшлi прагуляцца па вул. Дняпроўскай флатылii. Падчас прагулкi iм на вочы трапiлi металiчныя ўрны для смецця. Хулiганы паламалi 13 штук. Заведзена крымiнальная справа.

Сымон Свiстуновiч.

Будынак цэнтра маркетынгу падпалiлi?

У Вiцебску гарэў будынак, якi належыць прадпрыемству "Вiцебскi абласны цэнтр маркетынгу i прадпрымальнiцтва". Увечары вiдавочцы ўбачылi агонь i патэлефанавалi ў пажарную службу.

Калi пажарныя прыехалi, гарэў шыферны дах двухпавярховага будынка. Пажар хутка лiквiдавалi. У вынiку пажару былi пашкоджаны 110 квадратных метраў даху. Страты падлiчваюцца. Мяркуецца, што будынак нехта падпалiў. Хулiганы або канкурэнты? — следствам будзе вызначана.

Аляксандр ПУКШАНСКI.

Перакулiўся

На аўтамагiстралi Iвацэвiчы—Гродна каля в. Шэйпiчы Пружанскага раёна ехаў беспрацоўны з в. Малочкi, якi не меў вадзiцельскага пасведчання. Акрамя гэтага, 21-гадовы хлопец быў п'яны. I не дзiўна, што яго ВАЗ-2101 апынуўся ў кювеце i перавярнуўся.

19-гадовы пасажыр загiнуў.

Украла раз, другi i папалася

Беспрацоўная з г. Калiнкавiчы на калгасным рынку ў Драгiчыне выкрала ў мясцовай жыхаркi грошы, дакументы вадзiцеля i банкаўскую картку.

Праз паўгадзiны яна абрабавала жыхарку Кобрына — выкрала грошы i банкаўскую картку.

Аператыўная група зладзейку вылiчыла i затрымала.

Сымон Свiстуновiч.