Максiмка не прайшоў

Источник материала:

Спробу ўвозу буйной партыi "шэрага" спiрту спынiлi супрацоўнiкi Вiцебскай мытнi сумесна з калегамi з КДБ i мiлiцыi.

Як паведамiлi карэспандэнту "Звязды" ў прэс-службе Дзяржаўнага мытнага камiтэта, увагу прыцягнуў аўтамабiль УАЗ, якi на вялiкай хуткасцi ўехаў на тэрыторыю Лёзненскага раёна з боку Расii. Пры аглядзе транспартнага сродку высветлiлася: у iм схавана адразу 240 полiэтыленавых пяцiлiтровых бутэлек са спiртам. Нiякiх суправаджальных дакументаў на тавар не было, затое неўзабаве на месца здарэння прыбыў невядомы, якi прапанаваў "разысцiся па-добраму"— за 3 тысячы расiйскiх рублёў.

Калi ж гэта не спрацавала, iнiцыятыву ўзяў вадзiцель. Са скаргамi на холад ён папрасiўся сесцi ў аўтамабiль, каб пагрэцца. Аднак лiтаральна праз некалькi хвiлiн пакiнуў салон — тут распачаўся пажар, прычынай якога, як высветлiлася пазней, стаў падпал. Тым не менш груз захаваць удалося — ён канфiскаваны, па факце кантрабанды пачаўся разбор. Адначасова вырашаецца пытанне аб пачатку крымiнальнай справы за спробу дачы хабару.