"Наламаў дроў" моцны вецер

Источник материала:

Два дні запар над тэрыторыяй краіны "сваволіў" навальнічны фронт з парывамі ветру да 22 метраў за секунду. За гэты час, па ўзгодненых звестках Міністэрства па надзвычайных сітуацыях, 231 населенаму пункту ў Брэсцкай, Гродзенскай, Мінскай і Магілёўскай абласцях была нанесена матэрыяльная шкода.

У прыватнасці, разбураны тры сельскагаспадарчыя будынкі: сенасховішчы ў вёсках Гарадзілава Маладзечанскага і Глядавічы Мастоўскага раёна, цялятнік у вёсцы Жусіны Ваўкавыскага раёна. У Слаўгарадзе і на тэрыторыі раёна — у вёсцы Папоўка — абрынуліся трубы комінаў на кацельні прадпрыемства "Жылкамунгас" і Васьковіцкай сярэдняй агульнаадукацыйнай школы. Былі пашкоджаны дахі 193 жылых дамоў, 7 аб'ектаў сацкультбыту, 4 вытворчыя будынкі і 315 — сельскагаспадарчых. У шэрагу абласцей і ў Мінску работнікам МНС давялося прыбіраць упаўшыя дрэвы. У сталіцы дрэва пры падзенні пашкодзіла аўтамабіль. На тэрыторыі краіны былі абясточаны 1 190 населеных пунктаў, 134 сельскагаспадарчыя будынкі, 2 463 трансфарматарныя падстанцыі. У Гродзенскай вобласці на тэрыторыі чатырох лясгасаў былі пашкоджаны лесанасаджэнні на плошчы амаль 35 гектараў. Пацярпелых не было.

Сяргей РАСОЛЬКА.