Ратвейлер пакусаў дзяўчынку

Источник материала:

Уладальніца сабакі абавязана выплаціць матэрыяльную і маральную кампенсацыю шкоды

— Гаспадыня сабакі пароды ратвейлер размаўляла са знаёмай. Сабака быў без намордніка. Пакуль жанчыны гутарылі, сабака накінуўся на дзяўчынку. Потым пацярпелай зрабілі дзве аперацыі на правай руцэ. Дарэчы, школьніца з пяці гадоў вучыцца іграць на скрыпцы, — расказвае Марыя Духнова, старшы пракурораддзела па наглядзе за адпаведнасцю закону судовых пастаноў па грамадзянскіх справах пракуратуры Віцебскай вобласці. — Бацькі дзяўчынкі праз суд патрабавалі кампенсаваць матэрыяльную і маральную шкоду: 2 мільёны за адзенне, якое было пашкоджана, лекі падчас лячэння і ўзмоцненае харчаванне, а маральную страту ацанілі на суму 10 мільёнаў рублёў. Падчас разгляду ў судзе інцыдэнту версіі гаспадыні сабакі і пацярпелага боку вельмі адрозніваліся. Гаспадыня сабакі запэўнівала, што дзяўчынка сама вінаватая. Маўляў, чаму пайшла туды, дзе быў сабака? Ды яшчэ хацела пагладзіць яго. І чаму бацькі дзяўчынкі пускаюць яе гуляць адну ў восем гадзін вечара? Віцебскі абласны суд не задаволіў касацыйную скаргу. У выніку ўладальніца сабакі абавязана кампенсаваць матэрыяльную і маральную шкоду. Яе таксама прыцягнулі да адміністрацыйнай адказнасці ў выглядзе штрафу за выгул сабакі без намордніка.

Аляксандр ПУКШАНСКІ.