Жанчына кінула малое дзіця дома і пайшла са знаёмым абкрадаць маладзечанскі кіёск

Источник материала:

Жанчына са сваім мужам і знаёмым выпівалі 8 лістапада ў яе дома. Потым яны пасварыліся і выклікалі міліцыю. Мужа жанчыны забралі на суткі.

Каля 5 гадзін раніцы  яна пакінула сваё малое дзіця дома і разам са знаёмым пайшла на вуліцу. Калі яны падышлі да кіёска, мужчына дастаў малаток і нож і ўзламаў ралет.

Жанчына залезла ўнутр і забрала адтуль 29 упаковак ігральных картаў, шмат пачак цыгарэт 16-ці відаў, дзіцячыя цацкі, батарэйкі, касеты для галення, кантрацэптывы, чыпсы, гарбату, шампунь, фарбу для броваў і павек, асвяжальнік паветра,  ёлачны шарык, флікер, пульт і DVD-прайгравальнік, флэшку і 30 тысяч рублёў.  Калі ўсё накрадзенае перавесці ў грошы, то атрымаецца 1 мільён 365 тысяч рублёў.

Мужчына ўзяў сабе тры пачкі цыгарэт і ўсё накрадзенае жанчынай паставіў каля кіёска. Заўважыўшы аўтамабіль, які якраз пад’язджаў да месца здарэння, збег.

Жанчыну ж затрымалі ў кіёску супрацоўнікі міліцыі. Ужо потым яна расказала, як усё адбылося.

Яны разам выпівалі і вырашылі схадзіць у краму па цыгарэты. Калі праходзілі каля кіёска, жанчына сказала, што ўмее адкрываць ралеты. Ён вырашыў дапамагчы і разбіў шкло. Тады жанчына залезла ўнутр і перадала мужчыну скрынкі з рэчамі.

У гэты час пад’ехала машына, і “калега” збег. Яна ж не змагла самастойна выбрацца з кіёска, і яе затрымалі.

Суд прыгаварыў абвінавачаную да года пазбаўлення волі. Але адтэрмінаваў пакаранне на год. Абвінавачанага ж суд прыгаварыў да трох гадоў пазбаўлення волі без накіравання ў выпраўленчую  ўстанову адкрытага тыпу.

Суд таксама вынес прыватную пастанову ў аддзел адукацыі Маладзечанскага райвыканкама з-за неналежнага выканання жанчынай сваіх бацькоўскіх абавязкаў, бо яна пакінула сваё малое дзіця аднаго дома.

Iван НЕЎМЯРЖЫЦКІ, памочнiк пракурора Маладзечанскага раёна.

Фота s.citysites.com.ua.