Папараць-шкатулка

Источник материала:

Стала вядома, якімі сувенірамі будуць здзіўляць на купальскім свяце “Александрыя збірае сяброў”

Учора падвялі вынікі конкурсу на лепшы сувенір-сімвал свята Купалля (на фота), якое ўжо па добрай традыцыі сёлета пройдзе ў Александрыі Шклоўскага раёна 6—7 ліпеня. На мэце конкурсу, які праводзіла Беларуская гандёва-прамысловая палата, было паспрыяць развіццю нацыянальнай сувенірнай галіны і вызначыць работы, якія змогуць набыць ці атрымаць у падарунак госці свята, што набыло статус міжнароднага, а значыць, і прадстаўляць яго трэба варта.

На суд журы было прадстаўлена 136 работ ад устаноў адукацыі і культуры, адкрытых акцыянерных таварыстваў, індывідуальных прадпрымальнікаў з усіх рэгіёнаў краіны.

— У конкурсе прынялі ўдзел майстры ва ўзросце ад 10 да 73 гадоў. Прадставілі свае работы як творчыя саюзы, так і ўстановы культуры, аддзелы адукацыі, арганізацыі, — распавёў намеснік міністра культуры Беларусі, старшыня камісіі Уладзімір Карачэўскі. — Гэта не ўсё, што можна было прадставіць. Патэнцыял нашых майстроў яшчэ большы. Аднак годныя работы знайшліся.

Якія асацыяцыі выклікае ў большасці з нас свята Купалле? Вада, вяночкі, папараць-кветка... Удзельнікі конкурсу на лепшы сувенір-сімвал свята Купалля аказаліся нашмат больш арыгінальнымі. Сярод прадстаўленых работ былі і пантофлі з беларускім арнаментам, і драўляны падсвечнік, і скураная вокладка, і нават лялька на ровары.

Няпроста было вызначыць журы лепшых з лепшых.

— Купалле набыло статус нацыянальнага свята і, у пэўнай ступені, брэнда такога маштабу, як Міжнародны фестываль мастацтваў “Славянскі базар у Віцебску” ці Рэспубліканскі фестываль-кірмаш “Дажынкі”. Мы прааналізавалі, як святкуецца Купалле ў нашых суседзяў, — у Расіі, Украіне. Сёння толькі ў Беларусі свята мае падобны маштаб, што з’яўляецца вельмі вялікай каштоўнасцю, — сказаў намеснік старшыні Беларускай гандлёва-прамысловай палаты Уладзімір Улаховіч.

Таму і сувенір трэба было выбраць не проста яркі і заўважны, але такі, які, з аднаго боку, змог бы ў поўнай меры адлюстраваць багацце беларускай культуры і нацыянальных традыцый, а з другога — спрацаваў бы на фарміраванне іміджу краіны. У ліку асноўных патрабаванняў да работ былі выкарыстанне купальскай сімволікі або эмблемы свята, арыгінальнасць, якасць, кошт, тэхніка выканання, мастацка-стылявыя вартасці, магчымасць масавага вырабу.

Пераможцаў вызначылі ў некалькіх намінацыях у залежнасці ад выкарыстанага майстрам матэрыялу. Сярод лідараў аказаліся саламяныя вянкі, выцінанка “Купальская кветка”, глінянае зубраня з птушкай на спіне, сумачка з нацыянальным арнаментам для мабільнага тэлефона, керамічнае пано “Купалле”. Гран-пры конкурсу ўзяла “Папараць-кветка” Іны Саўчук з Магілёўскай вобласці.

— Нам спадабалася ідэя майстра, — падзяліўся Уладзімір Карачэўскі. — Сувенір лёгка запусціць у масавую вытворчасць. Яго можна вырабляць не толькі з саломкі, але і іншых матэрыялаў, выкарыстоўваць у якасці шкатулкі, проста для ўпрыгожвання інтэр’еру, перарабіць у магніт або брошку. Да таго ж гэта досыць бюджэтны сувенір. Па ацэнцы аўтара, саламяная “Папараць-кветка” абыдзецца госцю свята ў сто тысяч беларускіх рублёў.