У сталічным метро злавілі 17-гадовага “зачэпера”

У сталічным метро злавілі “зачэпера” — аматара катацца на цягніку, чапляючыся за падножку апошняга вагона. 17-гадовы шукальнік прыгодаў выканаў гэты небяспечны трук 25 траўня: ён праехаў адзін прыпынак ад “Першамайскай” да “Пралетарскай”, прычапіўшыся да хваста цягніка. За любоў да рызыкі на хлопца склалі адміністратыўны пратакол і расцанілі яго ўчынак як дробнае хуліганства.

Такі экстрэмальны занятак у свеце называюць “трэйнсёрфінгам”. У Мінску пра экстрэмалаў-“зачэпераў” загаварылі пасля таго, як некалькі гадоў таму падлетак пракаціўся на падножцы апошняга вагона цягніка. Хлопец тады не пацярпеў, паведамляе прэс-служба ГУУС Мінгарвыканкама.