Больш 30 населеных пунктаў Гарадзеншчыны заставаліся без святла з-за навальніцаў

Падзенне дрэваў падчас навальніцаў сталі прычынай адключэння святла больш, чым у 30 населеных пунктах Гродзенскай вобласці, паведамляе Міністэрства надзвычайных спраў.

У Слоніме цягам трох гадзінаў без электрычнасці заставаліся 35 шматкватэрных і 235 прыватных дамоў. Прычына — знос кабеля.

Двойчы адключалася электразабеспячэнне ў Дзятлаўскім раёне — 7 населеных пунктаў у Казлоўшчынскім сельсавеце і 12 у Дварэцкім. У абодвух выпадках прычынай стала падзенне дрэваў на лінію электраперадачы.

З-за падзення дрэваў адключэнні электраэнергіі былі і ў Мастоўскім з Карэліцкім раёнах.

Таксама адной з прычынаў адключэння святла ў Мастоўскім раёне было пападанне маланкі ў апору лініі электраперадачы.

Цяпер электразабеспечэнне амаль ва ўсіх населеных пунктах узноўлена.