Лёс сабакі, які адгрыз руку васьмімесячнай дзяўчынцы, вырашыць суд

Лёс сабакі пароды хаскі, які адгрыз руку васьмімесячнай дзяўчынцы, вырашыць суд. У цяперашні час ён знаходзіцца ў пункце часовага ўтрымання жывёл (гэтае месца вызначыла следства). Сабаку прызналі "рэчавым доказам па справе". Пра гэта ў Facebook напісала афіцыйная прадстаўніца Следчага камітэта Юлія Ганчарова.

Трагічнае здарэнне адбылося ў сакавіку гэтага года ў Фрунзенскім раёне Мінска. 25-гадовая маці спала ў стане алкагольнага ап'янення, калі сабака напаў на яе дзіця і адгрыз руку. Дзяўчынка памерла ад страты крыві. Жанчыне прад’явілі абвінавачванне па ч. 3 арт. 159 КК. Сваю віну яна прызнала. Расследаванне крымінальнай справы ўжо завершанае. Яе атрымаў пракурор для накіравання ў суд.