Дзяўчынку, якая выжыла ў аварыі, дзе загінулі пяць чалавек, прааперавалі

У Докшыцкай раённай лякарні прааперавалі дзевяцігадовую дзяўчынку, якая адзіная выжыла ў страшнай аварыі. Як піша "СБ — Беларусь сегодня" са словаў начальніка ўпраўлення аховы здароўя Віцебскага аблвыканкама Юрыя Дзеркача, на дапамогу докшыцкім дактарам былі аператыўна адпраўленыя нейрахірург, хірург і рэаніматолаг з Віцебска. Аперацыя прайшла паспяхова, аое перавозіць маленькую пацыентку пакуль нельга. Да дзяўчынкі выклікалі з Санкт-Пецярбурга яе маму.

Як распавядала Еўрарадыё, здарэнне адбылося позна ўвечары 20 ліпеня ў Докшыцкім раёне Віцебшчыны. Аўтамабілі "Форд Мандэа" і "Аўдзі-80" сутыкнуліся лоб у лоб. Паведамлялася, што "Аўдзі", якая рухалася з боку Мінску, нечакана выехала на сустрэчную паласу, што і стала прычынай аварыі.

Машыны пры сутыкненні ператварыліся ў вялікую кучу жалеза. На месцы загінулаі пяць чалавек. Жывой засталася толькі дзевяцігадовая дзяўчынка, якая разам з 50-гадовым бацькам ехала ў "Фордзе" да бабулі ў Мінск. Яе ў цяжкім стане даставілі ў раённую лякарню.

У "Аўдзі", якая стала прычынай аварыі, ехалі чатыры жыхары Полаччыны. Кіраваў ёй жыхар Полацкага раёна, а пасажырамі былі навапалачане ва ўзросце 29, 30 і 35 гадоў.

Па факце гібелі людзей Следчы камітэт пачаў крымінальную справу.