Стала вядомая прычына пажару на "Нафтане", падчас якога пацярпеў адзін чалавек

Стала вядомая прычына пажару на "Нафтане". На прадпрыемстве адбылося ўзгаранне дрэнажнай сістэмы помпавага абсталявання падчас правядзення агнявых работ, інфармуе прэс-служба "Нафтана".

Адзначаецца, што 14 кастрычніка супрацоўнікі арганізацыі "Промтэхмантаж" праводзілі планавы капітальны рамонт на ўстаноўцы "Дэпарафінізацыя № 1" (у дрэнажнай сістэме ёсць парафін). Каля 10-й гадзіны, пасля ўзгарання, помпавае абсталяванне было аператыўна адключанае ад электрычнасці. Спачатку пажар лакалізавалі, а пасля і ліквідавалі.

Пацярпелых сярод работнікаў, якія займаліся рамонтам, няма. Лёгкую траўму атрымаў аператар тэхналагічнай устаноўкі, у яго парэз шклом перадплечча. Рамонтныя працы ўжо працягваюцца.