У Старадарожскім раёне мужчына з рэўнасці забіў госця металічнай трубой

У Старадарожскім раёне мужчына забіў госця металічнай трубой. Здарэнне адбылося ўвечары 7 лістапада ў вёсцы Навасёлкі. У дом да 34-гадовага мужчыны прыйшоў яго 41-гадовы сусед, які прыехаў на лецішча. Яны распівалі алкагольныя напоі, а пасля паміж імі ўзнікла сварка. Гаспадар спачатку збіваў госця кулакамі, а пасля — металічнай трубой. Калі ён зразумеў, што забіў суседа, вырашыў пазбавіцца ад цела — занёс труп на суседскі падворак і пакінуў на зямлі на ноч.

Раніцай іншыя суседзі ўбачылі труп і патэлефанавалі ў міліцыю. Намеснік начальніка Старадарожскага РАУС Віталь Сакаў адзначае, што праваахоўнікі аператыўна выйшлі на след падазраванага ў здзяйсненні забойства, яго затрымалі. Мужчына расказаў, што спрэчка ўзнікла на глебе рэўнасці — госць запрасіў на танец яго сужыцельку.

Па факце наўмыснага нанясення цяжкіх цялесных пашкоджанняў, якія сталі прычынай смерці, распачалі крымінальную справу. Вяскоўцу пагражае да 15 гадоў пазбаўлення волі.