У Пухавіцкім раёне прарвало трубаправод — без цяпла засталіся тысячы людзей

Прарыў трубаправода ў пасёлку Праўдзінскі Пухавіцкага раёна пакінуў без цяпла і гарачай вады некалькі тысяч чалавек. Аварыя адбылася ў пятніцу, 6 студзеня, у другой палове дня. Разрыў трубы здарыўся на вуліцы Цэнтральнай — на трубаправодзе было завязана 45 жылых шматкватэрных дамоў, інтэрнат, сярэдняя школа, садок і лякарня.

Для рамонтных працаў прыцягнулі 11 работнікаў і тры адзінкі тэхнікі, паведамляе прэс-служба МНС. У 0.30 суботы замена пашкоджанага ўчастка трубы была завершаная і ў сістэму пачалі падаваць ваду.

Аднак па стане на 6.00 7 студзеня без цяпла і гарачай вады заставаліся 35 шматкватэрных дамоў, дзе жыве 1400 чалавек.

На месцы аварыі працавала камісія на надзвычайных сітуацыях, падрыхтаваныя месцы для часовага размяшчэння людзей, аўтатранспарт для дастаўкі, забеспячэнне харчаваннем.