У Магілёве памерла 4-гадовая дзяўчынка, якую жорстка збіў сужыцель яе маці

У Магілёве памерла 4-гадовая дзяўчынка, якую жорстка збіў сужыцель яе маці. Дзеянні 26-гадовага мужчыны перакваліфікавалі на “забойства заведама малалетняга асобы з асаблівай жорсткасцю” (ч. 2 арт. 139 КК). Ён знаходзіцца пад вартай, расследаванне крымінальнай справы працягваецца, паведаміла ў Facebook афіцыйная прадстаўніца Следчага камітэта Юлія Ганчарова.

Як інфармавала Еўрарадыё, трагічнае здарэнне адбылося ў вёсцы Амховая-1 у Магілёўскім раёне. Раніцай 31 сакавіка там знайшлі ў непрытомным стане з цялеснымі пашкоджаннямі дзяўчынку. Паводле папярэдніх звестак, яе збіў сужыцель маці, які пасля гэтага сышоў з хаты. Маці дзіцяці ў гэты час знаходзілася на працы. Спачатку мужчыне выставілі абвінавачанне ў наўмысным прычыненні цяжкага цялеснага пашкоджання ў дачыненні да заведама малалетняй. Падазраванага адразу ж узялі пад варту. Вядома, што раней ён меў праблемы з законам. Дзяўчынцы аказвалі дапамогу ў Магілёўскай абласной дзіцячай лякарні.