У Мядзельскім раёне выратавалі чатырох байдарачнікаў

23 красавіка экіпажам двух байдарак ў Мядзельскім раёне Міншчыны спатрэбілася дапамога ў сувязі са складанымі ўмовамі надвор'я. 

Ратавальнікі атрымалі просьбу аб дапамозе ў 16.26, паведамляе сайт МНС. На возеры Мястра каля вёскі Гатавічы экіпажы дзвюх байдарак не маглі плысці ў сувязі з моцным ветрам і высокімі хвалямі. 

Выявілася, што ў суботу група з 20 турыстаў на 10 байдарках адправілася па маршруце ад кемпінга "Качэргі" каля аднайменнай вёскі да ракі Скема каля вёскі Гатавічы. Дзве байдаркі не змаглі прайсці па гэтым маршруце да канца ў сувязі з пагаршэннем надвор'я. 

Работнікі МНС і Таварыства ратавання на водах (ОСВОД) выратавалі чатырох турыстаў. Шпіталізацыя ім не спатрэбілася.