Міліцыя затрымала "зайца", які пырснуў у твар кантралёру з пярцовага балончыка

У Мінску затрымалі мужчыну, які ехаў без квітка і пырснуў у вочы кантралёру з пярцовага балончыка. Пра гэта агенцтву БЕЛТА распавёў начальнік Першамайскага РУУС сталіцы Андрэй Парашчук.

Як паведамляла Еўрарадыё, здарэнне адбылося 11 кастрычніка. Мужчына ехаў у тралейбусе 29-га маршруту, калі туды зайшлі кантралёры. Паказваць праязныя дакументы ён адмовіўся, таму кантралёры вывелі пасажыра на прыпынак. Там ён пырснуў у твар аднаму з іх і ўцёк.

Інфармацыя пра здарэнне разам з фатаграфіяй зламысніка трапіла ў СМІ. Даведаўшыся, што яго шукаюць, мужчына спалохаўся і праз дыспетчара кантрольна-рэвізійнай службы КУП "Мінсктранс" стаў шукаць пацярпелага кантралёра, каб папрасіць прабачэння. Кантралёр адразу паведаміў пра гэта супрацоўнікам крымінальнага вышуку Першамайскага РУУС.

Мужчыну затрымалі на сустрэчы з кантралёрам і даставілі ў РУУС для дачы тлумачэнняў. Гэта 54-гадовы жыхар Мінска. Ён патлумачыў, што ў той вечар ехаў па асабістых справах, але не меў грошай , таму не стаў аплачваць праезд.

Калі яго вывелі на прыпынак, "заяц" не стаў чакаць прыбыцця міліцыі ды паспрабаваў уцячы. Калі кантралёр перагарадзіў яму шлях, мужчына ўзгадаў, што ў яго ў кішэні ляжыць пярцовы балончык. Ён пырснуў кантралёру ў твар і ўцёк у бок вуліцы Каліноўскага. Па словах мужчыны, балончык ён насіў пры сабе для самаабароны. 

Цяпер на яго пачалі крымінальную справу за гвалт альбо пагрозу ў дачыненні да службовай асобы, якая выконвае службовыя абавязкі, або іншай асобы, якая выконвае грамадскі абавязак. За гэта парушальніку пагражае да пяці гадоў пазбаўлення волі. Таксама яго аштрафавалі за безбілетны праезд.