Як нараджаюцца музыкі

Источник материала:

Скрыпка… Які гэта прыгожы па гучанні музычны інструмент! Які цуд можна стварыць, іграючы на ёй! Скрыпка можа перадаць усе эмоцыі, стан душы. Але для гэтага трэба ўмець адчуваць яе, зжыцца з ёй.

У нашым горадзе шмат дзяцей і дарослых валодаюць гэтым інструментам. Многія з іх наведвалі скрыпічнае аддзяленне Стаўбцоўскай дзіцячай школы мастацтваў ці цяпер там вучацца.

Я вырашыла ўзяць невялікае інтэрв’ю ў Анастасіі Васільевай, якая ўваходзіць у састаў ансамбля скрыпачоў «Прызнанне». Доўгі час гэты ансамбль не меў пэўнай назвы. Але, удзельнічаючы ў рэспубліканскім этапе конкурсу «Львёнок» з творам беларускага кампазітара Целяпнёва «Прызнанне», ансамбль стаў лаўрэатам другой ступені. Гэтая кампазіцыя стала візітнай карткай ансамбля. Так і з’явілася назва.

Насця расказала, што ў склад ансамбля ўваходзяць сем вучняў і два настаўнікі – Таццяна Леанідаўна Кот і Ала Мікалаеўна Імамутдзінава, а таксама канцэртмайстар – Валянціна Мікалаеўна Ляхоўская.

Сама Насця займаецца на скрыпцы ўжо шосты год. Дзякуючы няспыннай працы ёй усё ўдаецца. Заняткі музыкай патрабуюць вялікіх намаганняў. І тыя дзеці, у каго не хапае цярпення, хто не можа спланаваць свой час для заняткаў музыкай, часта здараецца, пакідаюць справу на палове шляху. Таму выклікаюць павагу мае равеснікі, якія паспяхова асвойваюць дадатковую адукацыю і радуюць нас сваімі талентамі.

Калі я спыталася ў Насці, што значыць для яе музыка, яна адказала, што заняткі на скрыпічным аддзяленні дастаўляюць ёй вялікае задавальненне. Гэта не толькі асалода ад добрай музыкі, эстэтычнае выхаванне, але і магчымасць трэніроўкі памяці, развіцця арганізаванасці і самадысцыпліны. Для мяне было сапраўдным падарункам пачуць, як Насця іграе на скрыпцы.

Ульяна МІЛАШЭЎСКАЯ, вучаніца СШ № 3г. Стоўбцы