25 сакавіка. Чэрвень. Спартыўны комплекс «Ігумен». «Колас-Будаўнік»: Капітулец, Срыбненка, Кулікоў, Лапшын, Чалядзінскі, Варэнік, Чысты, Шмаянкоў, Свірыдовіч, Шмідаў, Весялоў, Курбанаў, Каражан. Галы ў «Коласа-Будаўніка»: Кулікоў (9), Лапшын (14, 42), Варэнік (25, 26), Няфёдаў («Старыя Дарогі» — у свае вароты, 43).
У мінулую нядзелю ў Чэрвені развіталіся з чэмпіянатам Мінскай вобласці па міні-футболу. “Колас-Будаўнік” у апошнім матчы выступаў перад сваімі прыхільнікамі ўжо ў рангу чэмпіёна. І хаця для нашай каманды гэтая сустрэча не мела ніякага турнірнага значэння, у першым тайме чэрвеньцы паказалі сваю фірменную камбінацыйную гульню.
Ужо на 9-й хвіліне матча лік адкрыў Аляксей Кулікоў. Гэты мяч стаў сотым для “Коласа-Будаўніка” ў сёлетнім чэмпіянаце. Затым галявую перавагу чэрвеньцаў павялічыў лепшы бамбардзір каманды Андрэй Лапшын. А незадоўга да перапынку дублем “адсалютаваў” яшчэ адзін галеадор гаспадароў поля Аляксандр Варэнік – 4:0. Пад заслону першай паловы сустрэчы госці распячаталі вароты Станіслава Капітульца.
У дэбюце другога тайма нашы прадоўжылі граміць “Старыя Дарогі”. Другі раз у матчы вызначыўся Андрэй Лапшын, а потым ігрок гасцей ненаўмысна зрэзаў мяч ва ўласныя вароты.
Пры ліку 6:1 футбалістам “Коласа-Будаўніка” цяжка было знайсці матывацыю для далейшай барацьбы. А вось у старадаражан яна была: нават нічыя ў гэтым матчы пакідала ім шанц заваяваць бронзавыя медалі.
Дзякуючы гэтаму, у сустрэчы да самага яе заканчэння захоўвалася хоць нейкая інтрыга. “Старыя Дарогі” здолелі скараціць разрыў у ліку да мінімуму. Аднак фінальная сірэна зафіксавала перамогу “Коласа-Будаўніка” – 6:5.
Пасля гэтага адбылася цырымонія ўзнагароджання нашых футбалістаў. Залатыя медалі чэмпіянату ім уручылі старшыня федэрацыі футбола Мінскай вобласці Алег Чыкун і яго намеснік Юрый Майстроў. Прыемна, што і прыз лепшага іграка чэмпіянату атрымаў футбаліст “Коласа-Будаўніка” – Дзмітрый Чысты.
Ва ўрачыстасці таксама бралі ўдзел ганаровы грамадзянін Чэрвеньскага раёна, заслужаны трэнер Рэспублікі Беларусь Анатоль Усенка і вядомы беларускі футбаліст, чэмпіён СССР 1982 года ў складзе каманды “Дынама” (Мінск) Юрый Трухан. Яны ўручылі памятныя падарункі нашым футбалістам Дзмтрыю Чыстаму і Захару Каражану. Яшчэ адзін падарунак – варатарскія пальчаткі ад ураджэнца Чэрвеня, загадчыка кафедры БДУФК Віктара Шукана – атрымаў галкіпер “Коласа-Будаўніка” Станіслаў Капітулец.
Главная
Гороскопы
