У Мінску "Аўдзі" ўляцела ў аварыйны выхад станцыі метро "Грушаўка" (фота)

У Мінску "Аўдзі" сутыкнулася з аварыйным выхадам ля ўвахода ў метро. Здарэнне адбылося раніцай 18 верасня на скрыжаванні праспекта Дзяржынскага і вуліцы Шчорса каля станцыі метро "Грушаўка". На месца прыязджалі ратавальнікі, якія вызвалялі чалавека, якога заціснула ў салоне. Прыязджала і "хуткая". Былі шпіталізаваныя кіроўца і пасажырка.

З-за здарэння ўтварыўся вялікі затор транспарту ў накірунку цэнтра Мінска.

У здарэнні ўдзельнічаў і "Мерсэдэс". Цяпер ён стаіць у некалькіх дзясятках метраў ад месца ДТЗ.

Пазней ГУУС Мінгарвыканкама паведаміла папярэднюю версію здарэння. Мяркуецца, што кіроўца "Мерсэдэса" пры перастраенні ў першую паласу руху здзейсніў сутыкненне з "Аўдзі", які пасля ўдару адкінула ў аварыйнае выйсце. Таксама ў міліцыі распавялі, што кіроўца "Аўдзі" не мае правоў кіроўцы.

Як паведамляла Еўрарадыё, днямі "Мазда" заехала ў падземны пераход станцыі метро "Акадэмія навук". На шчасце, ніхто з людзей не пацярпеў.