В эстафете примут участие 450 факелоносцев

Факел, распрацаваны дызайнерам фонду “Дырэкцыя II Еўрапейскіх гульняў 2019 года”  Юліяй Брайчук у супрацоўніцтве са спецыялістамі завода-вытворцы – ААТ  “Навагрудскі завод газавай апаратуры”, – з’яўляецца працягам агульнай канцэпцыі брэнда II Еўрапейскіх гульняў, які натхняе марай, тоіць у сабе загадкі прыроды краіны, напаўняе энергіяй квітнеючы з кожным годам горад. Алімпійскія ідэалы і вобраз полымя на беларускай зямлі ўвасабляюцца ў зіхатлівай папараць-кветцы.

Факел, корпус якога выраблены з нержавеючай сталі, важыць крыху больш за 1,7 кг, яго вышыня 81 см. Вага і цэнтр цяжару спецыяльна падабраныя для максімальна зручнага выкарыстання падчас бегу. Прадугледжана магчымасць мацавання да веласіпеда і інваліднай каляскі.

Для прэзентацыі факела эстафеты агню  “Полымя міру” былі запрошаныя вядомыя беларусы, дзеячы спорту, культуры і мастацтва.

Згодна з агульнасусветным стандартам правядзення падобных эстафет, працягласць гарэння факела складае каля 15 хвілін, што з’яўляецца дастатковым для таго, каб людзі, якія прымаюць удзел у эстафеце, змаглі пераадолець сваю дыстанцыю.

Маршрут эстафеты  “Полымя міру” стартуе 3 мая ў Рыме (Італія). Роўна праз 50 дзён (21 чэрвеня) шлях эстафеты завершыцца ўрачыстым запальваннем чашы алімпійскага агню на цэнтральнай арэне II Еўрапейскіх гульняў –  Нацыянальным алімпійскім стадыёне “Дынама”. Агонь Гульняў пабывае ў 55 населеных пунктах на тэрыторыі 8 краін (Італія, Славакія, Славенія, Венгрыя, Аўстрыя, Чэхія, Польшча і Беларусь). Працягласць маршруту складзе 7700 км.

У эстафеце прымуць удзел 450 факеланосцаў, 100 валанцёраў і 10 захавальнікаў агню. Полымя II Еўрапейскіх гульняў падымецца на вышэйшую кропку Еўропы – гару Манблан, наведае славутасці краін па шляху руху эстафеты, а 12 мая прыбудзе ў Беларусь, дзе зможа пабываць ва ўсіх кутках нашай краіны: пройдзе сцежкамі Нацыянальнага парка “Белавежская пушча”, праплыве па Аўгустоўскім канале, наведае сядзібы Т. Касцюшкі і М.К. Агінскага, замкі ў Міры і Навагрудку, спусціцца ў солевыя шахты ААТ  “Беларуськалій”.

На цырымоніі таксама прадстаўлена форма ўдзельнікаў эстафеты агню  “Полымя міру”, распрацаваная беларускім дызайнерам Юліяй Латушкінай, якая мае вопыт паспяховага супрацоўніцтва з найбуйнейшымі спартыўнымі праектамі ў нашай краіне. Традыцыйна выкананая ў светлых колерах форма сімвалізуе свет і чысціню намераў, што адпавядае ідэалам алімпійскага руху.

Падрыхтаваў Аляксандр ШЭДЗЬКО.

Надрукавана ў №28 ад 09.04.2019 г.