У Краснаярскім краі Расіі прарвало дамбу: загінула 13 рабочых

У Краснаярскім краі Расіі прарвало дамбу —  у выніку загінула 13 чалавек. Як паведамляе ТАСС са спасылкай на выратавальнікаў і праваахоўныя органы, здарэнне адбылося ў ноч на суботу ў Курагінскім раёне, дзе знаходзіцца золатаздабываючы прыіск. На рацэ Сейба разбурылася дамба ў тэхналагічным вадаёме.

Вадой змыла некалькі баракаў, дзе жылі работнікі прыіску. Загінула 13 чалавек, яшчэ 14 атрымалі траўмы, трое з іх у цяжкім стане. Лёс  15 чалавек пакуль невядомы.

Пасёлак рабочых прыіску знаходзіцца далёка ад населеных пунктаў у тайзе, там праблемы з сувяззю.

Інцыдэнт расследуе Следчы камітэт Расіі. Аварыйна-выратавальныя службы займаюцца ліквідацыяй наступстваў здарэння.