Беларусь звярнулася ў Эканамічны суд СНД з іскам па пытанні пошлін на прадукты перапрацоўкі нафты і нафтахімічную сыравіну з Расіі

Источник материала:

Міністэрства юстыцыі Беларусі звярнулася ў Эканамічны суд СНД, які выконвае функцыі суда ЕўрАзЭС, з іскавай заявай па пытанні, якое датычыцца правамернасці спагнання вывазных мытных пошлін на прадукты перапрацоўкі нафты і нафтахімічную сыравіну, што пастаўляюцца з Расіі ў Беларусь. Аб гэтым БЕЛТА паведамілі ў прэс-службе Міністэрства юстыцыі Беларусі.

У Мінюсце адзначылі, што з 1 студзеня 2010 года на падставе тэлетайпаграмы першага намесніка кіраўніка Федэральнай мытнай службы Расіі прадукты перапрацоўкі нафты, у тым ліку нафтахімічная сыравіна, якія пастаўляюцца з Расіі ў Беларусь, абкладаюцца вывазной мытнай пошлінай. На неаднаразовыя звароты беларускага боку за тлумачэннем прававых падстаў такіх дзеянняў выразных адказаў ад расійскага боку да гэтага часу не атрымана.

Між тым прымяненне вывазных мытных пошлін на прадукты перапрацоўкі нафты, якія выкарыстоўваюцца ў якасці хімічнай сыравіны ў бесперапынных вытворчых працэсах, сур'ёзна ўскладніла, а па асобных пазіцыях — прывяло да поўнага спынення паставак такіх нафтапрадуктаў на нафтахімічныя прадпрыемствы Беларусі. "Па сутнасці, гэта азначае пагрозу поўнага спынення работы шэрагу найбуйнейшых прадпрыемстваў нафтахімічнага комплексу Беларусі, якія маюць цесныя кааперацыйныя сувязі, у тым ліку і з аналагічнымі прадпрыемствамі Расіі", — канстатавалі ў прэс-службе Мінюста.

Такім чынам, неправамернае патрабаванне выплаты экспартнай пошліны на вывозімыя з Расіі ў Беларусь прадукты перапрацоўкі нафты і нафтахімічную сыравіну вельмі негатыўна ўплывае на працэсы паглыблення эканамічнага супрацоўніцтва паміж суб'ектамі гаспадарання дзвюх краін, супярэчыць цывілізаванай практыцы міжнароднага гандлю і падрывае базавыя прынцыпы добрасуседства ва ўзаемаадносінах паміж Беларуссю і Расіяй.

Беларусь з'яўляецца адзінай дзяржавай — удзельніцай Мытнага саюза, адносна якой Расія прымяняе гэты падыход.

У Мінюсце дадалі, што пытанне аб правамернасці і законнасці такіх дзеянняў расійскага боку неаднаразова станавілася прадметам перагавораў і кансультацый на ўсіх узроўнях і ва ўсіх фарматах. Яно абмяркоўвалася на пасяджэнні Камісіі Мытнага саюза 26 лютага гэтага года ў Маскве, а затым — на пасяджэнні Саўміна Саюзнай дзяржавы 16 сакавіка ў Брэсце. Аднак ні перагаворы, ні афіцыйная перапіска не прынеслі ніякіх вынікаў.

У такой сітуацыі беларускі бок не бачыць іншага спосабу абароны сваіх законных правоў і інтарэсаў, акрамя звароту ў міжнародныя судовыя інстанцыі.

Для фіксацыі маючых месца рознагалоссяў паміж Беларуссю і Расіяй у трактоўцы міжнародных абавязацельстваў у рамках ЕўрАзЭС і Мытнага саюза ў прымяненні да гандлю нафтапрадуктамі Міністэрства юстыцыі Беларусі ў поўнай адпаведнасці з устаноўленым парадкам падрыхтавала і накіравала іскавую заяву ў Эканамічны суд СНД, які выконвае функцыі суда ЕўрАзЭС, які з 1 ліпеня 2010 года павінен будзе таксама выконваць функцыі суда Мытнага саюза.

Сутнасць пададзенай іскавай заявы ў тым, што заключаныя міжнародныя дагаворы ў рамках СНД і ЕўрАзЭС, а таксама адпаведныя міжнародныя дагаворы паміж Беларуссю і Расіяй прадугледжваюць бяспошлінны гандаль у рамках рэжыму свабоднага гандлю. Напрыклад, пагадненнем паміж урадам Беларусі і ўрадам Расіі аб свабодным гандлі ад 13 лістапада 1992 года і пратаколам аб увядзенні рэжыму свабоднага гандлю без выключэнняў і абмежаванняў паміж Беларуссю і Расіяй ад 6 студзеня 1995 года ўстаноўлена, што бакі не прымяняюць пошліны ва ўзаемным гандлі. Адзіным выключэннем з рэжыму бяспошліннага гандлю з'яўляецца сырая нафта, частка якой абкладаецца экспартнай пошлінай у адпаведнасці са спецыяльным двухбаковым пагадненнем. Узаемны гандаль усімі астатнімі таварамі павінен ажыццяўляцца бяспошлінна.