Новыя рэйтынгі ад «TNS‑Украіна»: Лукашэнку пішуць 76%

Источник материала:

Кіраўнік украінскай сацыялагічнай кампаніі «TNS‑Украіна» Мікалай Чурылаў паведаміў «Нашай Ніве», што з"явіліся свежыя вынікі сацыялагічных апытанняў па прэзідэнцкіх выбарах у Беларусі.

«Ведаеце, мы праводзілі яшчэ адно апытанне.

Прыцягнулі да працы новых людзей. Аднак яны, калі казаць сваімі словамі, правалілі працу. Атрыманыя лічбы істотна адрозніваліся ад папярэдніх.

Праблемы атрымаліся ў Віцебскай вобласці. Яўны перакос быў зроблены на карысць моладзі і людзей з вышэйшай адукацыяй. Але мы прыбралі гэтыя звесткі. Усяго было апытана 1500 чалавек», — кажа М.Чурылаў.

Вось якія лічбы дае прадстаўнік «TNS‑Украіна». Найперш трэба адзначыць, што 20% рэспандэнтаў не вызначыліся з сваім кандыдатам. 15% сказалі, што не пойдуць на выбары, а 6% адмовіліся размаўляць.

З тых, што засталіся, атрымаліся наступныя лічбы:

Аляксандр Лукашэнка — 75,9%

Уладзімір Някляеў — 5,4%

Андрэй Саннікаў — 5,2%

Яраслаў Раманчук — 2,2%

Віктар Цярэшчанка — 1,9%

Рыгор Кастусёў — 1%

Алесь Міхалевіч — 1%

Віталь Рымашэўскі — 0,9%

Мікалай Статкевіч — 0,9%

Дзмітрый Ус — 0,6%

Супраць усіх — 5%.

Чаму лічбы за Лукашэнку за месяц так узраслі? Бо яшчэ на лістападаўскім апытанні за Лукашэнку гатовыя былі прагаласаваць 55% выбарцаў. Чурылаў кажа, што лічба не змянілася істотна. Проста новы рэйтынг без уліку людзей, што не вызначыліся і не пойдуць на галасаванне, у адрозненне ад папярэдняга.

Мікалай Чурылаў кажа, што вынікі экзіт‑полаў будуць абвешчаныя ў нядзелю 19 снежня а 20:01. Сацыёлаг перакананы, што на гэты раз праблем з падлікам не павінна ўзнікнуць. «Калі ўбачым, што ідуць фальсіфікацыі, то такіх людзей будуць адразу выдаляць», — зазначае кіраўнік кампаніі.

Ва ўмовах аўтарытарызму адмаўляюцца адказваць або не паведамляюць свайго выбару акурат тыя, хто супраць аўтарытарнага лідэра. Таму 26% ад выніку Лукашэнкі можна было б адмінусаваць. Аднак сацыёлагі таго не робяць.

Варта нагадаць, што «TNS‑Украіна» працуе на замову лукашэнкаўскага канала АНТ.