Аляксандр Лукашэнка даручыў уважліва праверыць гатоўнасць сельгасарганізацый да веснавых палявых работ

Источник материала:

Прэзідэнт Беларусі Аляксандр Лукашэнка ў ходзе рабочай паездкі ў Мінскую вобласць даручыў уважліва праверыць гатоўнасць сельскагаспадарчых арганізацый да веснавых палявых работ, перадае карэспандэнт БЕЛТА.

У прыватнасці, кіраўнік дзяржавы звярнуў асаблівую ўвагу на ступень гатоўнасці тэхнікі і ўмовы захоўвання мінеральных угнаенняў.

Як далажыў Прэзідэнту міністр сельскай гаспадаркі і харчавання Міхаіл Русы, у гэтым годзе сельгаспрадпрыемствы краіны ўпершыню будуць забяспечаны мінеральнымі ўгнаеннямі на 100 працэнтаў. У цэлым захоўванне завезеных мінеральных угнаенняў арганізавана на належным узроўні, аднак кіраўнік дзяржавы запатрабаваў засяродзіць увагу на негатыўных фактах. "Паглядзіце прынцыпова на ўсе гаспадаркі і дзейнічайце вельмі строга. Сёння кожны ходзіць, скардзіцца: спішы крэдыты, — а пад адкрытым небам ляжаць дарагія ўгнаенні", — сказаў Аляксандр Лукашэнка, звяртаючыся да старшыні КДК Аляксандра Якабсона. Пры гэтым ён падкрэсліў, што брыгадна па краіне ездзіць не трэба, а трэба спагнаць прынцыпова ў кожнай вобласці з двух-трох чалавек.

Прэзідэнт таксама запатрабаваў далажыць яму аб выкананні дадзеных раней даручэнняў па гатоўнасці сельгастэхнікі. Паводле слоў Аляксандра Якабсона, гатоўнасць тэхнікі складае ад 92 працэнтаў да 96 працэнтаў. "Гэта тэхніка, гэта жыццё людзей і гэта дарагая рэч, — падкрэсліў Аляксандр Лукашэнка. — Вазьміце на кантроль выбарачна і паглядзіце ў асобных раёнах, асабліва ў тых, якія нас больш за ўсё хвалююць, не чапаючы там, дзе нармальна працуюць".

Рэагуючы на заўвагі Аляксандра Якабсона аб тым, што ў цэлым па рэспубліцы ўкамплектаванасць сельгасарганізацый механізатарамі складае каля 88 працэнтаў, Аляксандр Лукашэнка падкрэсліў, што гэтым пытаннем павінны займацца губернатары, але тэхніка павінна быць падрыхтавана і быць у ідэальным стане. Больш таго, ён адзначыў, што ўзмоцнены кантроль дзяржавы ў гэтым пытанні апраўданы, паколькі менавіта яна выдзяляла сродкі на закупку тэхнікі. "Купіць ён (кіраўнік сельгаспрадпрыемства. — <І>Заўвага БЕЛТА ) за асабістыя грошы, ну, Гасподзь з табой, калі за асабістыя грошы, ён будзе яе захоўваць, як асабісты аўтамабіль", — адзначыў Аляксандр Лукашэнка, дадаўшы, што ў астатнім у гэтым пытанні неабходны жорсткі кантроль, каб не было неабходнасці траціць вялікія сродкі на закупку новай тэхнікі.

У цэлым Аляксандр Лукашэнка адзначыў, што дзяржава і ў далейшым прадоўжыць падтрымку сельгасвытворцаў у пытанні тэхнічнага аснашчэння, аднак аб'ёмы гэтай падтрымкі павінны скараціцца. "Мы не можам сёння такім жа чынам аказваць падтрымку вёсцы, як гэта было мінулыя гады", — сказаў Прэзідэнт, адзначыўшы, што за мінулую пяцігодку на гэтыя мэты было патрачана амаль $50 млрд. "Гэта вялікая сума", — падкрэсліў ён.

Аляксандр Лукашэнка лічыць, што гаспадаркі, якія ўжо атрымалі падтрымку і працуюць больш-менш добра, самі павінны паступова закупляць неабходную тэхніку. "На гэта трэба арыентаваць. А дапамагаць мы будзем".

Сітуацыя з гібеллю азімых пасеваў на палях знаходзіцца ў межах нормы. Там, дзе неабходна, будзе праведзена перасяванне, для чаго ёсць больш як 60 тыс. тон запасаў насення. Аляксандр Лукашэнка адзначыў, што да гэтага пытання таксама неабходна падысці па-гаспадарску. "Пасеем, а астатняе насенне трэба прадаць. Пакіньце сабе, колькі трэба па мінімуму, а з новага ўраджаю мы поўнасцю адновім гэты насенны фонд", — сказаў ён. У цэлым, паводле слоў Міхаіла Русага, беларускія аграрыі плануюць завяршыць сяўбу ранніх збожжавых культур да 1 мая, лёну — да 5 мая, бульбы і кукурузы — да 9 мая.

Аляксандр Лукашэнка асабліва звярнуў увагу на неабходнасць нарошчвання сельгасвытворчасці ў краіне і павышэнне яе эфектыўнасці ў сувязі з тым, што попыт на гэту прадукцыю ў суседніх і іншых краінах у перспектыве будзе толькі ўзрастаць. "За пяцігодку калі зробім рэнтабельнай сельскую гаспадарку (без дзяржпадтрымкі. — Заўвага БЕЛТА), краіна будзе жыць. Калі мы выйдзем на 10-12 працэнтаў рэнтабельнасці ў сельскай гаспадарцы па году, мы забудзем, што ў нас ёсць праблемы на зямлі".

Аляксандр Лукашэнка арыентуе Мінсельгасхарч на заключэнне доўгатэрміновых кантрактаў па пастаўках сельгаспрадукцыі за мяжу.

У прыватнасці, размова ішла пра бульбу. "Трэба ў гэтым годзе заключыць доўгатэрміновыя дагаворы па пастаўцы бульбы, — сказаў Аляксандр Лукашэнка. — Гэта Масква, Піцер, Расія, частка Украіны, і нам хопіць. Мы ж не будзем бясконца пашыраць пасевы бульбы. Трэба на аптымальныя аб'ёмы заключыць доўгатэрміновыя дагаворы".

Асаблівую ўвагу кіраўнік дзяржавы чарговы раз звярнуў на неабходнасць няўхільнага выканання яго патрабавання па стварэнні належных умоў для захоўвання бульбы. Захоўваць ураджай гэтай культуры ў буртах, дзе страты дасягаюць 30-40 працэнтаў, у сучасных умовах проста недапушчальна. "Маё патрабаванне было звязана перш за ўсё з тым, што безгаспадарліва выкарыстоўваецца мноства памяшканняў. Па краіне такіх мора — і ў Мінску, і ў іншых месцах. Трэба давесці да розуму тое, што ёсць".

Кіраўнік дзяржавы таксама папярэдзіў, што ўсе прыцягнутыя крэдытныя рэсурсы сельгасарганізацыям давядзецца вяртаць і дзяржава іх спісваць не будзе. "Калі яны думаюць, што будуць спісаны або мы ім падорым гэтыя грошы — гэтага не будзе", — падкрэсліў Прэзідэнт.

Паводле інфармацыі Мінсельгасхарча, у гэтым годзе плануецца атрымаць у сельскагаспадарчых арганізацыях і сялянскіх (фермерскіх) гаспадарках 1,5 млн тон бульбы, з якіх больш як 430 тыс. тон можна будзе накіраваць на экспарт.

Цяпер у сельскай гаспадарцы рэспублікі ёсць бульбасховішчы ёмістасцю 231,3 тыс. тон. У мэтах выключэння захоўвання бульбы ў буртах у адпаведнасці з даручэннем кіраўніка дзяржавы прадугледжана пабудаваць і рэканструяваць у сельгасарганізацыях і фермерскіх гаспадарках бульбасховішчы ёмістасцю 356,2 тыс. тон. Прэзідэнт Беларусі Аляксандр Лукашэнка заклікае актыўней прыцягваць замежныя інвестыцыі для стварэння новых прадпрыемстваў у сярэдніх і малых гарадах краіны. Аб гэтым ішла размова ўчора ў час наведвання ім ЗТАА "Унамедыкал" у Дзяржынскім раёне. Кіраўнік дзяржавы лічыць, што такія прадпрыемствы павінны стварацца ў кожным раёне, паколькі яны істотна ўплываюць на эканоміку рэгіёну, ствараюць новыя рабочыя месцы.

Замежнае таварыства з абмежаванай адказнасцю "Унамедыкал", заснавальнікам якога выступала дацкая кампанія, з'яўляецца адным з валаўтваральных прадпрыемстваў Дзяржынскага раёна. Яго ўдзельная вага ў агульным аб'ёме прамысловай вытворчасці раёна складае больш за 10 працэнтаў. Асноўным відам дзейнасці з'яўляецца вытворчасць вырабаў медыцынскага прызначэння з давальніцкай сыравіны.