Беларусь прапануе Бангладэш доўгатэрміновае супрацоўніцтва і інвестыцыйныя праекты

Источник материала:

Аб гэтым заявіў учора прэм'ер-міністр Міхаіл Мясніковіч у горадзе Дака на сустрэчы з міністрам замежных спраў Бангладэш Дзіпу Моні, паведамляе БЕЛТА.

Беларусь разглядае супрацоўніцтва з Народнай Рэспублікай Бангладэш як доўгатэрміновае, заснаванае на ўзаемнай выгадзе, падкрэсліў Міхаіл Мясніковіч. "Мы прыехалі з канкрэтнымі праектамі і гатовы не толькі гандляваць, але і перадаваць нашы тэхналогіі, ноу-хау, каб ствараць тут вытворчасці", — адзначыў ён. Акрамя таго, Беларусь зацікаўлена ў партнёрстве з Бангладэш у галіне адукацыі, падрыхтоўкі кадраў. Беларускія ВНУ гатовы навучаць бангладэшскіх студэнтаў і пашыраць супрацоўніцтва ў гэтым напрамку.

"Калі ёсць прапановы з вашага боку, мы гатовы іх разглядаць", — дадаў прэм'ер-міністр. На яго думку, для паспяховай рэалізацыі сумесных праектаў дзвюм краінам трэба будзе значна ўмацаваць дагаворна-прававую базу.

Міхаіл Мясніковіч расказаў міністру замежных спраў Бангладэш аб развіцці і магчымасцях беларускай эканомікі. Бакі абмеркавалі перспектывы ўзаемавыгаднага супрацоўніцтва.

Гэтай жа тэме быў прысвечаны беларуска-бангладэшскі бізнэс-форум у горадзе Дака. Тавараабарот паміж краінамі складае $135  млн, але ён мог бы быць значна большы, падкрэсліў, выступаючы на ім, кіраўнік беларускага ўрада. "Мы ўдзяляем вялікую ўвагу як гандлёва-эканамічнаму, так і інвестыцыйнаму супрацоўніцтву з Бангладэш, — адзначыў Міхаіл Мясніковіч. — Беларусь прапануе праекты пад ключ, а таксама праекты з актыўным удзелам бангладэшскага боку". Гэта вытворчасць аўтамабільнай і трактарнай тэхнікі, партнёрства ў сельскай гаспадарцы і харчаванні, узаемадзеянне ў сферы высокіх тэхналогій і навукі.

Урад Беларусі гатоў стварыць спрыяльныя ўмовы для рэалізацыі сумесных праектаў. Беларусь зацікаўлена ў супрацоўніцтве з Бангладэш у галіне сельскай гаспадаркі, прамысловай вытворчасці, навукова-тэхнічнай сферы, адукацыі. "Мы адкрыты для супрацоўніцтва і гатовы працаваць і па іншых напрамках", — дадаў прэм'ер-міністр.

Асаблівую ўвагу ён звярнуў на перспектывы партнёрства дзвюх краін у калійнай галіне. "Мы гатовы забяспечыць вашу краіну калійнымі ўгнаеннямі ў поўнай меры", — падкрэсліў ён.

Кіраўнік урада выказаў упэўненасць у тым, што гэты візіт надасць імпульс развіццю двухбаковых адносін паміж краінамі і рэалізацыі канкрэтных праектаў.