Ураджайны старт жніва. Першую тысячу тон зерня намалацілі гаспадаркі Глускага раёна

Источник материала:

На сённяшні дзень у Глускім раёне ўжо намалочана першая тысяча тон зерня, хаця да масавай уборкі зерневых культур у гаспадарках толькі прыступаюць.

Па плане ў гэтым годзе ўсяго трэба зжаць 8509 гектараў зерневых і зернебабовых, у тым ліку больш за 1700 гектараў трыцікале, амаль чатыры з паловай тысячы гектараў жыта, 745 гектараў ячменю і крыху меней за тысячу гектараў аўса. На раніцу панядзелка было ўбрана 287 га, намалот — 845 тон, ураджайнасць — 29,4 ц/га. Па Магілёўскай вобласці ўраджайнасць зерневых і зернебабовых зараз складае 32 ц/га.

Трыцікале на мінулым тыдні пачалі жаць тры гаспадаркі: “Слаўгарадскі”, “Турыно-агра” і эксбаза “Глуск”. Першыя зжатыя гектары ўжо паказалі неблагую ў параўнанні з мінулым годам ураджайнасць — 31,2 цэнтнеры з гектара ў сярэднім па раёне. Летась на пачатку жніва яна была на ўзроўні 18—19 ц/га, а на 20 ліпеня — 17,2 ц/га. Найбольшыя  плошчы гэтай гібрыднай культуры трэба зжаць у “Слаўгарадскім” (520 га), з іх убрана ўжо 163 гектары, намалочана 506 тон, а ўсяго па раёне ўбрана 223 гектары трыцікале.

У нядзелю, 19 ліпеня, камбайнеры трох гаспадарак — “Турыно-агра”, РАПТЗ і “Глускай Зары” — выйшлі на палеткі з азімым жытам. За дзень яны зжалі 54 гектары і намалацілі 125 тон зерня, на круг выйшла 23,1 ц/га. Канешне, пра канчатковы вынік зараз яшчэ гаварыць не прыходзіцца, але ўсё-такі хочацца адзначыць, што ўраджайнасць жыта ў гэтым годзе таксама вышэйшая за леташнюю (на такую ж дату было 17 ц/га).

Прадаўжаецца праца і на рапсавых палях, на ўчарашнюю раніцу было ўбрана 797 гектараў, гэта 55 працэнтаў ад патрэбнага, на круг выходзіць у сярэднім 8,8 ц/га, прыкладна такая ж лічба была летась. Найлепш урадзіў рапс на палетках РАПТЗ, дзе са 178 гектараў намалацілі 182 тоны, ураджайнасць — 10,2 ц/га. Вышэй за сярэднераённую ўраджайнасць рапсу таксама ў “Слаўгарадскім” і эксбазе “Глуск” — у абедзвюх гаспадарках 9,8 ц/га, а найменшая — у “Глускай Зары” (6,1 ц/га).

Што датычыцца корманарыхтоўкі, то тут сяльчане, карыстаючыся сухім надвор’ем, у хуткім тэмпе ўзяліся за сена. Калі тыдзень назад (13 ліпеня) меўся 31 працэнт ад патрэбнага, то на ўчарашнюю раніцу ўжо 46 працэнтаў, 1978 тон. Сенажу маецца 60 працэнтаў. У параўнанні з мінулым годам больш на амаль дзве тысячы тон нарыхтавана кармавых адзінак для грамадскага статка: зараз ёсць 11 200 тон к. адз, летась на такую ж дату было 9430 т к. адз. Але і гэта пакуль што ўсяго 28 з паловай працэнты ад неабходнага. У пераліку на ўмоўную галаву назапашана 8,47 ц к. адз., пры гэтым у РАПТЗ гэты паказальнік — 13,87 ц к. адз., тут ужо кармоў нарыхтавалі 48,6 % ад патрэбы.

Інфармацыя падрыхтавана па даных упраўлення сельскай гаспадаркі і харчавання і Мінсельгасхарчу на 20 ліпеня