Расiйска-беларускi саюз: аб'ядноўвацца або проста сябраваць

Источник материала:

Сацыялагiчныя апытаннi насельнiцтва, праведзеныя ў гэтым годзе Інстытутам сацыялогii НАН Беларусi i Усерасiйскiм цэнтрам вывучэння грамадскай думкi (УЦВГД), паказваюць падобнасць поглядаў беларусаў i расiян на магчымыя формы ўзаемаадносiнаў Расii i Беларусi.

Сярод жыхароў Беларусi пераважае думка аб будаўнiцтве адносiнаў з Расiяй на аснове мiжнародных дагавораў з захаваннем незалежнасцi дзяржавы — гэта адзначае 51 працэнт апытаных. За раўнапраўны саюз дзвюх дзяржаў са стварэннем наднацыянальных органаў кiравання выказваецца 41 % рэспандэнтаў. Уваходжанне ў склад Расiйскай Федэрацыi ў якасцi суб'екта(аў) федэрацыi падтрымлiваюць толькi 4 % апытаных (гл. дыяграму 1).

Паводле звестак, атрыманых падчас сацыялагiчнага апытання жыхароў Расii, каля 40 % расiян бачаць расiйска-беларускi саюз у форме аб'яднання дзвюх дзяржаў у адну на раўнапраўнай аснове. Трэць жыхароў Расii выступаюць проста за добрыя суседскiя адносiны без аб'яднання дзвюх краiн.

Пятая частка расiян хацела б бачыць Беларусь у складзе Расii на правах аднаго або некалькiх суб'ектаў Расiйскай Федэрацыi.

Пытанне аб магчымым мiждзяржаўным аб'яднаннi задавалася ў Расii i ў Беларусi ў крыху рознай форме. Аднак вынiкi адказаў сведчаць аб тым, што сёння i ў Расii, i ў Беларусi iснуе значная колькасць людзей, якiя выказваюцца за раўнапраўны саюз дзвюх дзяржаў са стварэннем наднацыянальных органаў кiравання.

Пераважная большасць беларускiх грамадзян (81%) лiчаць, што цяпер iнтарэсам нашай краiны больш за ўсё адпавядае цеснае супрацоўнiцтва з Расiяй. Гэтыя звесткi атрыманыя падчас сацыялагiчнага даследавання, праведзенага Iнфармацыйна-аналiтычным цэнтрам пры Адмiнiстрацыi Прэзiдэнта Рэспублiкi Беларусь (IАЦ) у II квартале 2009 г.

Думка беларусаў супадае з думкай расiян. Паводле звестак Усерасiйскага цэнтра вывучэння грамадскай думкi (УЦВГД), у чэрвенi 2009 г. тры чвэрцi апытаных выказалiся за далейшае зблiжэнне з Беларуссю.

  Пытанне аб тым, "за" цi "супраць" выступаюць грамадзяне Расii ў дачыненнi да працэсу зблiжэння дзвюх дзяржаў, расiйскiя сацыёлагi задаюць сваiм суайчыннiкам на працягу трох гадоў. Колькасць адказаў "за" за гэты час практычна не змянiлася.

На працягу апошнiх дзесяцi гадоў пераважная большасць расiян заяўляюць аб сваiм пазiтыўным стаўленнi да Беларусi. Гэтыя звесткi абнародаваныя расiйскiм Аналiтычным Цэнтрам Юрыя Левады (Левада-Цэнтр). З 2000 года не менш як 80 % апытаных расiян ацэньваюць сваё стаўленне да Беларусi як вельмi добрае або ў асноўным добрае.

Паводле звестак, атрыманых падчас апытання, праведзенага Усерасiйскiм цэнтрам вывучэння грамадскай думкi (УЦВГД), 45 % расiян успрымаюць Беларусь як дружалюбную дзяржаву, 33 % — як гандлёвага i эканамiчнага партнёра. Кожны дзясяты лiчыць Беларусь стратэгiчным саюзнiкам Расiйскай Федэрацыi (гл. дыяграму 2).

Iнфармацыя Iнфармацыйна-аналiтычнага цэнтра пры Адмiнiстрацыi Прэзiдэнта Рэспублiкi Беларусь.