АБЗАЦ

Источник материала:

Мінпрыроды Беларусі стварае рабочую групу для высвятлення прычын масавага ўсыхання дрэваў у лясных масівах, паведаміла на прэс-канферэнцыі ў Мінску намеснік міністра Галіна Валчуга. "Мы сутыкнуліся з гэтай з'явай некалькі месяцаў таму і пакуль не гатовыя назваць прычыну", — сказала яна. У склад групы ўвойдуць спецыялісты прыродаахоўнай галіны, навукоўцы.

Скутарыст загінуў пад коламі грузавіка ў Гомельскім раёне. Мясцовы жыхар, які ехаў на скутары па дарозе, упаў. У гэты час на яго і наехаў МАЗ. Як сведчыць ДАІ, гэта не першы падобны выпадак. З-за невялікага дыяметра пярэдняга кола скутары нярэдка перакульваюцца, пры рэзкіх манеўрах часам вадзіцелі пералятаюць праз руль і разбіваюцца. Дарожная міліцыя раіць скутарыстам выбіраць спакойны стыль ваджэння, не рабіць рэзкіх манеўраў. Пажадана таксама надзяваць ахоўны моташлем.

У выніку ўдару маланкі загінуў 55-гадовы жыхар вёскі Уза Буда-Кашалёўскага раёна. Трагедыя адбылася позна вечарам. Паводле папярэдняй інфармацыі, калі пачалася навальніца, мужчына знаходзіўся ў адкрытым полі, за 150 м ад дрэва. Ён быў дастаўлены ў бальніцу, аднак выратаваць яго не змаглі.

Смяротна траўмаваны электрычным токам 16-гадовы жыхар пасёлка Мухавец Брэсцкага раёна. Гэта здарылася а першай гадзіне ночы 1 чэрвеня. Крык сына, які знаходзіўся ў сваім пакоі адзін, пачула яго маці. Жанчына знайшла сына без прыкметаў жыцця на падлозе. Паводле папярэдніх звестак, старшакласнік праводзіў эксперыменты з электрычным токам, ад удару якога і загінуў. Праверку праводзіць пракуратура Брэсцкага раёна.