Мінскі раён «Ржавец» аддалі двойчы. І Батурынай, і кітайцам

Источник материала:

«Кітайскія інвестары пабудуюць у Мінску гасцінічны комплекс «Пекін», раёны «Чайна-таўн» і «Лебядзіны», — заявіў начальнік упраўлення інвестыцый камітэта эканомікі Мінгарвыканкама Мікалай Ахраменка. Хоць гарадскі чыноўнік і ўжыў назву «Лебядзіны», насамрэч мікрараён каля "Мінск-Арэны", рынку "Ждановічы" і Піянерскім пасёлкам называецца «Ржавец». Адпаведнае рашэнне было прынята мінскім саветам дэпатутаў некалькі гадоў таму.

Асаблівую цікавасць выклікае сітуацыя менавіта з ім. Хоць інвестыцыйная дамова наконт «Ржаўца» яшчэ не падпісаная, а значыцца, невядомы і аб’ём фінансавання, Мікалай Ахраменка агучыў канкрэтныя ўмовы беларуска-кітайскага супрацоўніцтва. Праект рэалізуецца сумесна з пекінскай кампаніяй «Хуа-О». Яе інтарэсы ў Беларусі прадстаўляе прадпрыемства «Чжун-Цінь Аб’яднанне», якое і будзе ажыццяўляць будаўніцтва.

Архітэктурны воблік будынкаў і збудаванняў, элементы ландшафтнага дызайну, што ўваходзяць у склад будучага жылога комплексу, «будуць адлюстроўваць нацыянальныя і гістарычныя асаблівасці кітайскай архітэктуры».

Карацей, яшчэ адзін чайна-таўн.

Усё б нічога, калі б гэты мікрараён у свой час не быў паабяцаны жонцы былога мэра Масквы Юрыя Лужкова Алене Батурынай і яе кампаніі «Інтэка». Яшчэ ў 2006 годзе масквічы адхапілі «оптам» некалькі прэстыжных тэрыторый у Мінску — «Мінск-сіці», хмарачосы каля станцыі метро «Фрунзенская», забудова на праспекце Дзяржынскага, мікрараён «Ржавец».

Быў зацверджаны праект забудовы «Ржаўца», вызначаны інвестар — «Банк Масквы». Раён распрацоўваўся цалкам па маскоўскіх нормах, а кіраўніком праекту з’яўляўся першы намеснік галоўнага архітэктара Масквы Юрый Грыгор’еў. Прапановы абодвух бакоў можна параўнаць на рэндэрах. Цікава, што расіянам паабяцалі плошчу 35,72 га, а вось кітайцам трохі больш — 36,2 га.

Пры тым, што кантракт з кітайцамі вось-вось будзе падпісаны, ад супрацоўніцтва з расіянамі таксама ніхто не адмаўляецца! Усё той жа Мікалай Ахраменка пацвердзіў, што «праектам Алены Батурынай у Менску нічога не пагражае».