Лазня карысная не ўсім, папярэджваюць спецыялісты

Источник материала:

Захапленне лазняй карыснае далёка не ўсім, таму перад паходам у лазню неабходна параіцца з урачом, папярэджваюць спецыялісты. Аб станоўчых баках наведвання лазні і аб супрацьпаказаннях карэспандэнту БЕЛТА расказалі ў Рэспубліканскім цэнтры гігіены, эпідэміялогіі і грамадскага здароўя.

Пара добра ўплывае на суставы і пазваночнік, якія любяць цяпло, пры якім узмацняецца іх кровазабеспячэнне. Калі хаця б раз на тыдзень хадзіць у лазню — не страшныя артрыт, астэахандроз і радыкуліт. Пад уплывам гарачыні лазневай працэдуры адбываецца актывацыя работы сардэчнай мышцы. Сіла яе скарачэнняў павялічваецца, рэгулярная парная дае трэніруючы эфект. Гарачыня лазні павялічвае цыркуляторныя працэсы ў арганізме, што садзейнічае расслабленню спазма ў тканках і органах. Паляпшэнне кровазабеспячэння, абмену рэчываў і дыхання, выдаленне таксінаў у выніку лазневай працэдуры стымулюе залозы ўнутранай сакрэцыі, у выніку чаго лепш рэгулюецца і каардынуецца дзейнасць органаў і сістэм арганізма. Гарачае, вільготнае паветра ўздзейнічае на гартань і на слізістыя абалонкі носа, дыханне пачашчаецца, становіцца больш глыбокім. Лазневая працэдура павышае прыкладна на трэць абмен рэчываў. Лепш засвойваюцца харчовыя рэчывы, шлакі акісляюцца і выводзяцца з арганізма, павышаецца апетыт, засваяльнасць ежы. І гэта толькі няпоўны спіс станоўчых эфектаў ад наведвання лазні.

Дарэчы, лазня можа стаць выдатным спосабам для загартоўвання. Гарачае паветра — цудоўны трэнажор для насаглоткі і падскурных сасудаў. Ад гарачыні яны расшыраюцца, і арганізм пачынае аддаваць цяпло, пры нармальнай тэмпературы сасуды звужаюцца — на гэтым заснаваны працэс загартоўвання. Эфект той жа, што і пры абліванні халоднай вадой, толькі нашмат больш камфортны. У гэтай справе важны тэмпературны кантраст, а ён больш значны, калі выходзіш з 80-градуснай парылкі ў прылазнік, дзе каля 20 градусаў.

Сёння найбольш папулярныя тры віды лазні: сухая фінская саўна, турэцкая хамам і руская парыльня. У ашчаднай турэцкай лазні тэмпература каля 45—50 градусаў, а вільготнасць паветра дасягае 95%. Нягледзячы на цяжкую вільготную атмасферу, хамам не супрацьпаказаны нават гіпертонікам, чаго не скажаш пра фінскую саўну, тэмпература ў якой можа дасягаць 120 градусаў. Саўна валодае моцным расслабляльным і заспакаяльным эфектам. У рускай парыльні гарачыня не падымаецца вышэй за 90 градусаў, а вільготнасць не перавышае 90%.

Аднак для гэтай, здавалася б, прыемнай і карыснай ва ўсіх адносінах працэдуры існуе цэлы шэраг супрацьпаказанняў, якімі ні ў якім выпадку не варта грэбаваць. Так, парыцца нельга падчас цяжарнасці, пры павышанай тэмпературы цела, чым бы гэта ні было выклікана. Акрамя таго, лазня супрацьпаказана пры цеплавой крапіўніцы, варыкознай хваробе, мастапатыі, гіпертаніі, бранхіяльнай астме з частымі прыступамі, схільнасці да сутаргаў (эпілепсіі), вострых інфекцыйных і анкалагічных захворваннях, цяжкай сардэчнай паталогіі, траўмах галаўнога мозга, вострых стадыях усіх хвароб, адкрытых ранах, сардэчнай і нырачнай недастатковасці, язвавай хваробе, малакроўі, склерозе сасудаў.