ХРОНІКА АПОШНІХ ПАДЗЕЙ

Источник материала:

Абама збірае з амерыканцаў па 5 долараў

Прэзідэнт ЗША Барак Абама заклікаў суграмадзян "скінуцца" па пяць-дзесяць долараў, каб дапамагчы тым, хто пацярпеў ад разбуральнага тарнада ў штаце Місуры.

105 чалавек у Місуры лічацца зніклымі без вестак. Ахвярамі стыхіі з пачатку мая стала 139 жыхароў Джопліна. Праз цэнтр гэтага горада прайшоў ураган, пакінуўшы за сабой лінію разбурэнняў даўжынёй у дзесяць кіламетраў і шырынёй у кіламетр. Прэзідэнт ЗША паабяцаў падтрымку з боку нацыянальнага ўрада і адзначыў, што свой унёсак у справу дапамогі пацярпелым могуць зрабіць усе грамадзяне краіны, "нават калі гэта пяць-дзесяць долараў, колькі можаце". Тарнада, які абрынуўся на горад напярэдадні, ужо прызнаны самым разбуральным у ЗША з 1950 года.

Германія адмовілася ад мірнага атама

Наступствы аварыі на АЭС "Фукусіма-1" прымусілі Германію цалкам адмовіцца ад выкарыстання мірнага атама.

Улады краіны вырашылі спыніць працу ўсіх атамных станцый да 2022 года. Да гэтага тэрміну ўрад разлічвае распрацаваць альтэрнатыўныя крыніцы энергіі, правесці дадатковыя лініі электраперадач. У сакавіку былі спыненыя рэактары сямі АЭС, пабудаваных да 1980 года. На ўсіх 17 атамных электрастанцыях, якія дзейнічаюць у краіне, пачаліся праверкі на прадмет бяспекі. У выніку працягваюць функцыянаваць толькі чатыры АЭС: "Ізар", "Брокдорф", а таксама па адным рэактару на станцыях "Некарвестхайм" і "Гундрэмінген". Паводле прынятага рашэння спыненыя рэактары ўжо не будуць запушчаныя зноў. Такім чынам, Германія стане першай прамысловай развітой краінай, якая спыніць выкарыстанне атама.

Памёр прэзідэнт Абхазіі

Абавязкі прэзідэнта часова ўскладзеныя на віцэ-прэзідэнта Аляксандра Анкваба.

У Маскве ў нядзелю, 29 мая, ва ўзросце 62 гадоў памёр прэзідэнт Абхазіі Сяргей Багапш. Прычынай смерці стаў рак. Прэзідэнт Абхазіі Сяргей Васільевіч Багапш нарадзіўся 4 сакавіка 1949 года ў Сухумі. Быў жанаты, у яго засталіся сын, дачка, унук і ўнучка.

Расіянка атруцілася ў Турцыі

Турыстка з Расіі памерла на турэцкім курорце Бодрум ад атручвання падробленым алкаголем. Загінулая — Марыя Шаляпіна 1983 года нараджэння.

Яшчэ шасцёра грамадзян Расіі знаходзяцца ў вельмі цяжкім стане. Яны дастаўленыя ў бальніцы Антальі і Дэнізлі і змешчаныя ў рэанімацыйныя аддзяленні. Паводле інфармацыі страхавых кампаній, скаргі на млоснасць, ваніты і страту прытомнасці пачалі паступаць ад турыстаў 28-29 мая. Усім тым, хто звярнуўся па медыцынскую дапамогу, быў пастаўлены дыягназ "атручванне няякасным алкаголем".

У Германіі ўзаконілі дзіцячы шум

Дэпутаты нямецкага бундэстага 26 мая аднагалосна ўхвалілі папраўкі да закона аб абароне ад шкодных выкідаў, фактычна ўзаконіўшы дзіцячы шум і пазбавіўшы ўсіх, незадаволеных крыкамі і віскам на дзіцячых пляцоўках, магчымасці падаваць пазовы ў суд.

Раней дзіцячы шум прыраўноўваўся да шуму ад прамысловых аб'ектаў, зараз жа, у адпаведнасці з новымі папраўкамі да закона аб выкідах, дзіцячы шум больш не разглядаецца як "шкоднае ўздзеянне навакольнага асяроддзя". Прадстаўнікі апазіцыі, якія таксама прагаласавалі за закон, патрабавалі пашырыць сферу яго ўжывання і нароўні з гульнявымі пляцоўкамі для маленькіх дзяцей узаконіць шум ад футбольных пляцовак і скейтадромаў, куды прыходзяць старэйшыя дзеці. У лютым 2010 года дзіцячы шум быў узаконены ў Берліне, які стаў першай федэральнай зямлёй, якая заканадаўча замацавала прывілеяваны статус дзіцячага шуму, выразна аддзяліўшы яго ад прамысловых шумоў. Падставай для дзеянняў зямельных і федэральных уладаў па абароне права дзяцей шумець сталі шматлікія судовыя пазовы з боку незадаволеных жыхароў, якіх раздражнялі крыкі дзяцей, што гулялі паблізу. У шэрагу выпадкаў суды ў адказ на скаргі нават зачынялі дзіцячыя садкі.

Кмен ратуе ад атэрасклерозу і запаленняў

Амерыканскія навукоўцы з Цэнтральнага тэхналагічнага навукова-даследчага інстытута правялі шэраг даследаванняў і высвятлілі: кмен дапамагае арганізму змагацца з мікробамі, спраўляцца з высокай тэмпературай, болевымі адчуваннямі і валодае высокай канцэнтрацыяй антыаксідантаў.

Не сакрэт, што свабодныя радыкалы правакуюць акісляльны стрэс. Гэта прыводзіць да парушэння нармальнага цячэння шэрагу працэсаў, развіцця атэрасклерозу, нейрадэгенератыўных хвароб, запаленняў у арганізме, раку і дачаснага старэння. У сваю чаргу антыаксіданты дазваляюць знізіць ступені ўплыву акісляльнага стрэсу. Падчас аналізу эксперты выявілі вялікае ўтрыманне карысных фенольных злучэнняў — антыаксідантаў — у кмене і яго здольнасць цалкам абараніць ад пашкоджанняў ДНК. Таксама ў нетрадыцыйнай медыцыне горкі кмен ужываецца для нармалізацыі працы страўнікава-кішачнага тракту, у якасці адхарквальнага, мачагоннага, гаючага і танізавальнага сродку.